Inversionistanan ta duda pa sigui inverti den Oranjestad of no
- Pasenshi a caba y tardansa ta causa daño real
ORANJESTAD (AAN): Tanto fanfaria pa bay yuda Oranjestad haya bida, pero awor ta mira con e grupo conoci como ‘Oranjestad Investment Group’ (OIG) a keda warda y warda... y nan buchi a cuminza yena!
Pasobra e compromisonan concreto a wordo haci. E plasonan a pasa. Inversionistanan mester di accion awo!
Durante e ultimo lunanan, OIG y e inversionistanan cu a compromete nan mes cu centro di Oranjestad a sigui scoge pa dialogo, cooperacion y pasenshi. Nan a reuni cu Gobierno, presenta e preocupacionnan, propone solucionnan y confia den e compromisonan cu a wordo haci.
Pero ta yega un momento cu pasenshi ta caba, y e tardansa aki ta cuminsa causa daño real.
Mas of menos tres luna pasa, despues di e presentacion di Sr. Jagersma tocante futuro di centro di Oranjestad, nan a pidi un reunion di emergencia cu Minister di Asuntonan Economico. Durante e reunion ey, e grupo di OIG a laga e urgencia di e situacion hopi cla.
Minister di Asuntonan Economico a compromete pa haci un anuncio tocante solucionnan pa centro di Oranjestad den prome siman di augustus.
Prome siman di augustus a pasa y nada.
Despues, a reuni cu Prome Minister, kende a asegura cu Gobierno ta comparti e mesun ambicion pa revitalisacion di Oranjestad. El a compromete pa trece e ministernan, departamentonan, inversionistanan y otro stakeholdernan relevante hunto na mesa a-la-dialogo social, inmediatamente despues di receso, pa asina trata e obstaculonan hunto y yega na solucionnan concreto.
Receso a pasa y nada. Ainda OIG ta wardando riba e reunion.
Dos siman pasa, despues di e carta habri dirigi na Minister di Infrastructura, OIG a reuni cu e Minister. Nan a considera e reunion como uno constructivo y nan a sali for di e reunion cu un impresion positivo di loke a wordo papia.
Minister di Infrastructura a indica cu dentro di aproximadamente un siman lo sigui un anuncio cu solucionnan concreto pa centro di Oranjestad.
E siman ey tambe a pasa, y ainda nan ta wardando.
Mientras tanto casi 1 aña a pasa desde cu a presenta e vision na gobierno. Cada siman cu pasa ta complica avance di proyectonan real y inversionnan haci.
Inversionista a compromete miyones di Florin den centro di Oranjestad. Propiedadnan a wordo cumpra. Capital a wordo inverti. Financiamento a wordo regla. Proyectonan ta wordo desaroya. Algun inversionista ta core riesgo financiero pasobra nan a compromete capital, pero ainda no por sigui cu nan proyecto. Otronan tin financiamento aproba, pero e financiamento ey no por keda den incertidumbre indefinidamente. Y otro inversionistanan ta cuminsa haci nan mes un pregunta hopi simpel:
Warda of bay otro lugar: OIG ta sigui warda riba Oranjestad, of ta inverti e placa na otro caminda?
Esaki ta un pregunta cu Aruba nunca mester a permiti inversionistanan serio cu ta cla pa yuda reconstrui y revitalisa nos capital yega na dje.
OIG ta reconoce y aprecia cu Minister di Asuntonan Economico a introduci incentivonan fiscal special pa stimula inversion den centro di Oranjestad. Esaki ta un paso positivo y ta demonstra e intencion pa atrae inversion y revitalisa e area.
Pero nos mester haci nos mes un pregunta fundamental: (*) Ki balor incentivonan fiscal tin si un inversionista no tin claridad si su proyecto por sigui?
Un incentivo fiscal solamente tin efecto si tin un ambiente caminda inversion por tuma luga. Si inversionistanan no tin claridad tocante e posibilidadnan di desaroyo, e proceduranan, e regulacionnan y e excepcionnan necesario pa nan proyectonan, e incentivo fiscal por ta bon riba papel, pero den practica e no ta suficiente pa haci e inversionnan realidad.
Cla pa inverti miyones: Gobierno a crea un incentivo pa atrae inversion na Oranjestad. Awor Gobierno mester crea e claridad necesario pa permiti e inversion ey tuma luga.
OIG no ta pidi Gobierno pa paga pa desaroyo di centro di Oranjestad. Inversionistanan priva ta cla pa inverti miyones di Florin y carga e riesgo comercial nan mes.
Loke nan ta pidi ta claridad, decisionnan y un cuadro regulatorio cu ta permiti e inversionnan aki sigui padilanti.
Nan ta reconoce cu Gobierno repetidamente a expresa su sosten pa revitalisacion di Oranjestad. Nan ta aprecia e sosten ey.
Pero despues di lunanan di reunionnan y varios compromiso concreto cu plasonan specifico, palabranan y bon intencion so no ta suficiente mas.
Mester di e anuncionan cu a wordo priminti. Mester di e reunion cu tur stakeholdernan cu a wordo priminti. Nan mester di solucionnan concreto por escrito. Nan mester di un calender cla pa implementacion.
Pa añanan largo Aruba ta papia di trece Oranjestad bek na bida. Awe nos tin algo sumamente balioso: inversionistanan cu realmente ta cla pa haci esaki realidad. No por perde nan pasobra Gobierno no a actua na tempo.
OIG ta keda cla pa sinta na mesa cu Prome Minister, e ministernan relevante, departamentonan y stakeholdernan pa traha constructivamente na solucionnan. Pero nan no por minimisa e urgencia mas. E plasonan cu a duna nos a pasa. E holoshi ta core, inversionnan ta na riesgo y OIG su pasenshi tin su limite. Oranjestad no por warda mas!
E potret aki di presentacion di OIG y Gobierno ta data di Juli 2025.
