A bishita Consul General di Hulanda na Miami
ORANJESTAD (AAN): Den fin di siman, Minister Oduber conhuntamente cu Aruba Ports Authority (APA) N.V. tabata tin un reunion positivo cu señora Lisette den Breems cu ta e Consul General di Hulanda na Miami na Florida.
Durante e reunion aki diferente temanan interesante den cuadro di turismo crucero a ser discuti. E meta di e reunion aki tabata pa sondia e posibilidad pa e consulado asisti Ministerio di Turismo y Aruba Ports Authority (APA) N.V. den e diferente proyectonan conforme e vision di Minister Dangui Oduber.
Minister Oduber a inicia e reunion elaborando ariba su vision pa cu nos turismo cual ta uno di “low volume high impact”. E meta di e vision aki ta pa enfoca mas ariba e calidad di turismo en bes di cantidad, haciendo uso di energia alternativo y sostenibel (climate resilience) y asina haci tur locual Aruba tin di ofrece na nos bishitantenan mas sostenibel pa futuro. Pa logra esaki Minister a elabora ariba diferente proyectonan y temanan di suma importancia.
E prome tema cu a worde discuti tabata e intencion di minsiterio di turismo di Aruba conhuntamente cu APA pa inicia conversacionnan cu Curacao y Bonaire pa bin cu un maneho integral pa cu e sector crucero entre e paisnan aki. Otro tema di hopi importancia na cual Minister Oduber a pidi sosten na Consul General di Hulanda ta e implementacion di e MOU cu ministerio di turismo di Aruba conhuntamente cu APA a firma cu Jacksonville Port Authority (JaxPort) na maart 2023. E meta di e cooperacion aki ta pa crea e oportunidad pa productonan por worde importa por medio di JaxPort na Aruba. Esaki lo haci cu Aruba lo tin productonan obtenibel na un manera mas continuo y sigur.
Por ultimo Minister Oduber a elabora ariba e tema cual ministerio di turismo hunto cu APA lo ta enfocando ariba dje durante e Seatrade Cruise Global Convention 2024 e siman aki, cual ta pa sondia posibilidadnan pa crea un oportunidad di ShorePower pa cruceronan cu ta hancra na Aruba. E meta di e proyecto aki ta pa durante cu cruceronan ta hancra na Aruba nan tin e oportunidad pa haci uso di e shorepower aki pa “charge” nan machinnan electronico abordo. Esaki lo sosode por medio di uso di energia alternativo sostenibel ofreci na Aruba mes.
Minister Oduber a keda hopi satisfecho cu e reunion cual a bay den un forma ameno y den cual Consul General a indica di ta bou impresion positivo con Aruba ta desaroyando riba tereno di turismo crucero. Consul General señora Lisette den Breems a sigura cu su persona lo duna su sosten na e diferente plannan cu a worde presenta den e reunion pa cu e futuro di turismo crucero na Aruba y e otro islanan cu ta forma parti di Reino Hulandes.
