Evelyn Wever-Croes como politico cu mas voto den oposicion
*Mike Eman cu solamente 428 voto mas cu Cecilia dirigente di Aruba
*Geoffrey Wever como Ministro di MEP a entrega Futuro 1903 voto
ORANJESTAD (AAN) — Cu e sistema politico di Aruba tin elementonan sumamente gracioso ora kier parti for di e punto democratico, ta bini dilanti den e hecho cu actualmente e persona cu ta conta cu mas voto personal di Pueblo, a keda den oposicion.
Ora mira cifranan di sosten di Pueblo na politiconan, hasta por nota cu den e ultimo eleccion, claramente e sosten cu Pueblo a duna un nobato den politica, casi ta iguala e sosten cu e persona cu a bira Prome Ministro di Aruba.
Continuamente por scucha e palabranan cu den e situacion electoral di Aruba, democracia y e sosten mayoritario di Aruba ta dicidi pero den eleccion 2024, cu awe a produci un Gabinete nobo di Mike Eman, no ta bira visibel.
E situacion aki ta uno sigur significante pa Aruba ora contempla e cifranan cu ta representa e resultadonan electoral mas recien di Aruba y no por nota con e sosten cu Pueblo a duna Mike Eman den politica a cay completamente.
E sosten di Pueblo na Mike Eman a culmina na 2009 cu 8.068 voto na momento cu el a haci su entrada cu e promesa di mitar BBO, cu tabata un promesa di campaña cu e no por a honra.
Na 2013 AVP a logra un victoria significante y Mike Eman a logra 8.202 voto den e epoca cu Hulanda tabata prepara pa na 2014 bin baha Mike Eman como Prome Ministro di Aruba for di su refugio mientras Aruba a wordo poni bou supervision di Reino.
E popularidad di Mike Eman a sigui baha na Aruba y na 2017 a alcansa 7.822 ora no solamente Florin tabata na peligro dor di mega debe mientras proyectonan Bo Aruba tabata mal tranca.
Na 2017 a bira visto cu e refineria cu Mike Eman a bisa cu lo trece rio di oro pa Aruba ora el a firma su acuerdo cu Nicolas Maduro, no por wordo realiza.
Na 2017 cu un total di voto di 7.822, Mike Eman a bandona Aruba, cu Evelyn Wever-Croes mester a hiba na un porvenir nobo cu un saldo favorabel pa comunidad di Aruba.
No a tende mas di Mike Eman ni kende sikiera tabata lidera su partido cu el a laga atras ora el a entrega su retiro como politico activo.
Diripiente den pandemia Covid-19, Mike Eman a bolbe sin cu nunca a tende kico e la haci for di 2017 y a trata na haya poder atrobe na 2021, ora solamente el a haya 6.668 voto y Evelyn Wever-Croes a ricibi e sosten mayoritario.
Mike Eman a insisti, pero a sigui baha den voto y na 2024 a haya solamente 5.277 voto pero e votonan di e cara nobo di AVP a entrega AVP e triunfo electoral cu alrededor di 300 voto.
Awe Mike Eman a bira Prome Ministro di Aruba den un sistema electoral caminda Evelyn Wever-Croes cu atrobe a ricibi e sosten di Pueblo di Aruba cu 6474 voto personal ta den Oposicion di Aruba.
DIARIO ta analisando cifranan cu ta papia un idioma cla riba representacion real di voluntad di Pueblo den e sistema electoral.
Mike Eman a bira Prome Ministro di Aruba cu sosten di e partido futuro cu tambe tin un gracia ya cu su Ministro Geoffrey Wever como miembro di Gabinete di Evelyn Wever-Croes pa Raiz, a logra 1903 voto pa Futuro, cu awe tin Geoffrey Wever como su Ministro.
DIARIO lo sigui elabora riba particularidadnan interesante Aruba.
