ORANJESTAD (AAN): Minister Plenipotenciario mr. Ady Thijsen a reuni na Aruba cu Minister di Finanzas y Cultura Xiomara Maduro.
Minister Thijsen a bisa Minister Maduro cu e meta di su bishita na Aruba ta pa duna un impresion riba su vision pa Arubahuis y Aruba na Hulanda y kico su maneho ta encera, na momento cu el a ricibi confianza di Conseho di Ministro pa ehecuta e funcion di Minister Plenipotenciario na Hulanda.
Pa ilustra su trabao y cu tur loke te ainda el a realisa na contactonan y terenonan cu por conduci na formanan di cooperacion den futuro, minister Thijsen a haci entrega di un buki cu tur e informacion aki. Sr. Thijsen a papia cu Minister Maduro riba e parti di finanzas, cu ta hunga un rol importante den e negosacionnan cu Hulanda pa e periodo nos dilanti; cu ta un topico cu sigur lo bin riba e agenda di Conseho di Ministro di Reino (RMR).
Otro aspecto cu Minister Thijsen a papia cu e titular di Finanzas y Cultura ta e tema di Herencia Cultural; kico esaki ta nifica pa Aruba.
Minister Thijsen a bisa Minister Maduro cu e ta hibando combersacionnan riba e tereno aki, pero e no por anuncia nada concreto ainda riba e tereno aki.
Finalmente Minister Maduro a bisa di ta sostene e esfuersonan cu Minister Thijsen ta haciendo riba e tereno aki. E potret ta cortesia di Arubahuis.
.
