ORANJESTAD (AAN): Diaranson mainta Minister di Turismo y Salud Publico, Sr. Dangui Oduber, a bishita Brickell Bay Beach Club & Spa.
Minister a ser ricibi pa e doño nobo di e hotel sr. Sr Visser, hunto cu e Gerente General sr. Juan Keyter y tambe señora Marvel Vilchez cu ta e Sales & Marketing Director, kende a splica over di e plan cu Brickell Bay tin pa futuro di e hotel aki. Na e momentonan aki a cuminsa cu renobacion di tur e cambernan. Nan lo renoba tambe e lobby area y e pool area den e siguiente lunanan pa asina por ofrece turista un mihor servicio y calidad moderno.
Pronto Brickell Bay lo cuminsa opera bao di un otro marca, cual nan mes lo anuncia den futuro cercano. Nan deseo ta pa amplea e propiedad aki cu cincuenta extra kamber. Minister Oduber ta menciona cu ta spera di por haya cooperashon di stakeholders pa cu esaki. Turismo ta keda e driver principal di nos economia y tur e visionan aki lo yuda eleva e producto cu nos ta brinda na nos bishitantenan.
Minister Oduber kier gradici e gerente y e staff di e hotel pa un bishita agradabel caminda cu nan a papia tocante varios tema incluyendo innovacion, inversion y remodelacion. Minister Oduber ta sumamente satisfecho cu e recorido aki y cu tur informacion adkiri. Tambe ta extende un palabra di danki na tur trahado cu ta haci nan esfuerso tur dia pa ofrece servicio di calidad y traha den un industria asina crucial pa pais Aruba.
{gallery}Brickell Bay Beach Club spa{/gallery}
