ORANJESTAD (AAN): Recientemente Minister di Labor Glenbert Croes a biaha pa Ginebra hunto cu e delegacion di Aruba,
pa asisti na e "International Labor Conference (ILO) 2024".
Pa cu e aña aki, e conferencia ta conta cu un participacion di mas di 187 pais y 5000 representante di diferente gobierno.
Durante e conferencia aki, lo atende e topico di proteccion di e trahado contra efectonan di e cambio climatico y tambe contra menazanan biologico, principalemente di loke a pasa cu Covid-19, y con el a afecta e trahado su salud y bienestar general.
Otro tema importante cu nan lo atende ta e tema di decencia cu mester tin den e trahadonan cu ta traha den e economia di cuido, y sigura cu nan derecho fundamental worde salbaguardia. Den cuadro di esaki e ta fundamental pa tin un Departamento di Labor cu ta fortifica, cu ta apoya y empodera, pa asina haci e trabaonan di supervicion y control, manera e departamento di Bureau Arbeids Inspectie cu nan inspectornan.
Tambe lo atende cu e tema importante di dialogo social, y con pa mantene e formato aki pa atende cu asuntonan di interes general cu ta afecta nos pais. E meta ta pa logra un coalicion mundial pa sigura cu a traves di cumplimento cu e SDG's nan nos por logra husticia social pa tur trahado den tur sector.
Durante su biahe tambe, Minister Croes lo tuma e oportunidad pa culmina e negociacionnan cu Acciona Energia na Madrid, pa asina finalisa e realisacion di e hydrogen valley, y pa cuminsa cu loke mester bira e cooperacion entre Gobierno di Aruba, Spaña, Repsol, y RDA, pa e parti bon di e infrastructura di e patio di tanki, por worde reactiva temporalmente. Repsol ta un compania cu ta hopi interesa pa yega na un cooperacion cu Aruba riba esaki.
"Mi ta bay cumpli cu e mision den nomber di pais Aruba, y lo regresa Aruba pa sigui atende tur asunto cu nos tin den cuadro di nos trabao" Minister Croes a expresa.
