Cobranza halto di coriente...
ORANJESTAD (AAN): Algo notable durante conferencia di prensa di gobierno, unda Minister Glenbert Croes a elabora riba e aumento drastico di awa y coriente pa cu recibonan di luna di September, ta cu lo bay tin un coreccion.
Segun Minister Croes ta splica, e aumentonan aki a tuma lugar, na nan parecer, contra e aprobacion di gobierno di Aruba. Gobierno a aproba un aumento riba e tarifa di awa y coriente di 24%, pero a resulta cu hopi famianan a haya recibonan cu un aumento di 50% of mas. Pa e motibo aki, Minister di Energia, sr Glenbert Croes a pidi e companianan estatal pa traha riba un investigacion di kico por a bay robes cu tin recibonan cu a subi drasticamente.
Pa Gobierno di Aruba e ta hopi importante di por yuda e companianan estatal sali for di e problemanan financiero cu nan ta aden, pero e solucion mester ta un cu pueblo por carga. E impacto di e subida di awa y coriente riba comunidad tabata grandi. Minister Croes a expresa cu tin un indicacion caba di kico por a bay fout pasobra cu no tin hustificacion pa e aumento drastico aki. Gobierno ta den espera di e resultado pa cu e coreccion di prijs di awa y coriente e siman aki, pa asina e companianan estatal efectua e coreccionnan necesario prome cu e pago di 14 di November.
