ORANJESTAD (AAN): Siman pasa, Ministro di Deporte, Gerlien Croes a dicidi na bay duik den e problema y
status quo cu a presenta pa cu uso di e local deportivo den bario di Simeon Antonio y Federacionnan Deportivo concerni.
El a splica cu como Minister entrante, el a hereda un situacion unda cu tin acuerdonan haci y discusion cu ta wordo hiba ariba maneho di e facilidadnan deportivo, e.o. Centro Deportivo Simeon Antonio.
Varios ta e decisionnan cu a wordo tuma, unda cu ta cuestiona e base huridico pa esakinan y cumplimento debido basa riba e acuerdonan haci, for di cual como Minister e tambe ta responsabel.
Segun Croes, e Minister di Deporte saliente a haci algun compromiso y awe e ta sinta cu un situacion caminda cu tin varios partido ta sinti nan mes den incertidumbre.
Siman pasa mes, Ministro a haci peticion na Fundacion Lotto pa Deporte y Fundacion Facilidadnan Deportivo pa comparti tur documentacion cu tabata tin di tur acuerdonan haci durante e ultimo 20 añanan y tambe notulanan di decisionnan tuma recientemente di directivanan concerni.
Algun documento a wordo ricibi caba y mi lo yama un reunion cu e partidonan concerni.
Transparencia y ‘Good governance’ tin cu lidera cada decision cu nos ta tuma y mundo di deporte mester conoce algun cambio real, no solamente cosmetico.
