Surinam ta pais rico na materia prima
ORANJESTAD (AAN): Despues di a organiza e Trade Mission exitoso pa Colombia, Investment Summit na Hulanda, y un Virtual Business Matchmaking cu Venezuela, Ministerio di Asuntonan Economico, Comunicacion y Desaroyo Sostenibel, bao guia di Minister Geoffrey Wever, conhuntamente cu Camara di Comercio Aruba (KVK), Departamento di Asuntonan Economico (DEACI), y Aruba Trade & Industry Association (ATIA) ta organiza un trade mission pa comerciantenan local. E biaha aki cu destinacion pa Surinam, for di 24 pa 28 di Juni venidero
“Aruba como pais chikito y un economia chikito mester haci uzo di instrumentonan pa stimula comercio via paisnan den region,” Minister Wever a cuminsa ta bisa, “Cu e trade mission aki nos kier explora e posiblidadnan di comercio cu Surinam.”
Surinam ta un pais conoci pa exporta azeta, oro pero tambe metal, palo, productonan pa construccion y mucho mas. P’esei ta importante pa hunto cu diferente stakeholders local bay Surinam explora e posiblidadnan. Mas comercio entre ambos pais ta uno interesante. Negoshinan por wak e mercado di Surinam como un oportunidad pa crece y trece diversificacion den nan portfolio di producto of servicio. Esaki lo duna e consimidor local tambe mas acceso na productonan di calidad, y posiblemente na un prijs mas bentahoso.
Algun luna atras un delegacion di Surinam a bin Aruba pa topa cu comerciantenan local y asina a cuminsa sondia e posiblidad di desaroya mas negoshi entre e dos pais nan.
Un invitacion ta bay na tur comerciante cu ta interesa pa forma parti di e Trade Mission aki pa registra mes via e link pa un sesion di informacion cual lo tuma luga diahuebs binidero, 23 di mei, na oficina di DEACI. Por registra via e siguiente link:
Minister Geoffrey Wever kier a gradici Camara di Comercio, DEACI y ATIA pa nan participacion y empeño pa por haci e Trade Mission aki posibel, y ta spera un mision fructifero pa e comerciantenan y pa e consumidornan di Aruba.
