ORANJESTAD (AAN): E biaha aki Kid$preneurs a continua na Tra’i Merdia di Scol Dornasol na Sabana Basora.
Aunke e biaha aki a conta cu un grupo mas chikito, e tarea di educa y inspira nos hobennan ta keda mesun importante.
“Mi ta contento di por a mira algun mucha cu hopi gusto, vision, y te asta algun conocemento di e elementonan pa maneha un empresa”, segun minister di Asunto Economico, mr Geoffrey Wever.
E futuro briyante di Aruba ta den man di nos hobennan, y nos mester sigui cu esfuerso pa sostene nan den nan soñonan, y inspira nan pa ta e miho persona nan por ta, eliminando cualkier barera na nan creatividad!
Sea den nan futuro nan lo escohe pa bira empresario of no, ta spera cu e curso di Kid$preneurs por yuda inspira algun mente hoben pa nan haci cualkier tarea cu nan lo kier eherce. “Nan por conta cu nos sosten”, minister Wever ta enfatisa.
Danki un bes mas na Departamento di Asunto Economico y nan unidad di IDEA pa nan determinacion. Proximamente lo continua cu e proyecto di Kid$preneurs na Scol di Kudawecha.
