ORANJESTAD (AAN): Curso 3 di e proyecto Finanzas den mi Hogar ta bay start na Oranjestad.
Despues e lo ta na Paradera y San Nicolas, pero awor e districto di Oranjestad ta na turno.
E curso ta start riba 8 di mei 2023 y tin un duracion di 4 siman. Na final di e curso cada cursista lo ricibi un certificado di participacion.
E curso ta consisti di 4 sesion cu lo enfoka riba con nos por maneha nos finansa cada dia. E 4 sesionan ta: (*) Sesion 1: Mi ta efectivo den mi cas. Con mi por spaar y tambe con pa cumpra sin emocion. (*) Sesion 2: Mi ta paga mi debe. Kico lo pasa ora mi no por paga mi debe mas.
Tambe tin (*) Sesion 3: Mi ta inverti den mi futuro. Futuro di nos y nos yiunan ta importante y con nos por logra nos metanan. (*) Sesion 4: Mi presupuesto. Kico ta luho y prioridad y con segun bo entrada bo por presupuesta y asina logra nos metanan.
Ta necesario pa remarca, e importancia di e curso aki. Na Aruba 3 di 10 hogar ta gasta mas di nan entrada tur luna segun sondeo di Banco Central di Aruba. E desaroyo aki ta uno preocupante pasobra e ta indica cu cada luna ta un reto pa hogarnan cumpli cu tur necesidad y responsabilidadnan financiero manera entre gasto pa vivienda, cuminda, y prestamonan personal. Como consumidor ta importante pa sa ki impacto cada decision financiero tin riba nos cartera y nos hogar. Cu e curso aki, nos ciudadanonan ta ricibi guia y conocemento cu por yuda tuma decisionan financiero cu ta beneficia su bienestar, den tur districto di Aruba y awor den districto di Oranjestad.
E Proyecto Finanzas den mi Hogar a worde desaroya door di Fundacion Plan di Bida. Fundacion Plan di Bida cu su presidente sra Paloma Osorio- Tromp tin como mision y vision trece conscientisacion den nos comunidad, ofreciendo ayudo y guia mustrando e manera pa maneha nos finansa mas efectivo. Hunto cu Fundacion Plan di Bida lo ofrece un curso como apoyo na nos hendenan.
Minister Geoffrey Wever ta invita cada pa registra y participa pa asina haya e apoyo necesario pa un maneho di bo finanzas. Registacion ta completamente gratis, pero cupo ta limita. Por haya detaye via email: This email address is being protected from spambots. You need JavaScript enabled to view it.
