ORANJESTAD (AAN): Recientemente Minister Endy Croes a reuni cu representantenan di Centro Medico Deportivo (CEMEDAR) cu ta un fundacion medico deportivo pa tur atleta na Aruba.
Presente na e reunion tabata presidente di CEMEDAR, sr. Sandy Roga, Dr. Ricardo Vargas, consehero, sr. Edmundo Josiah y señora Mángela Reyes.
DIARIO a compronde cu CEMEDAR ta conta cu ocho profesional cu ta traha cu e meta y vision pa yuda e atleta cu tin cualkier lesion.
CEMEDAR ta conta cu diferente ekiponan moderno cu nan mes a inverti den nan desde cu CEMEDAR a bira un fundacion na aña 2019. CEMEDAR ta duna diferente servicio manera; psicologia, masahi, terapia y fisioterapia pa yuda e atleta mehora y cura e lesion. CEMEDAR tin su oficina ubica na stadion Guillermo Prospero Trinidad na Dakota.
Minister Endy Croes a sigui bisa; CEMEDAR ta duna tratamento y ta guia e atleta pa asina preveni lesion, ademas atletanan cu ta den Seleccion Nacional nan tin masahistanan cu ta duna nan masashi deportivo pa asina prepara e atletanan pa competencia. Durante e reunion CEMEDAR a informa e mandatario di nan plan pa amplia y kisas den futuro brinda ayudo na comunidad den su totalidad, ya cu nan tin ekiponan cu nan por brinda e servicio aki. Tambe CEMEDAR a informa e mandatario cu pa realisa e plan nan tin mester di mas capacidad.
E vision di prevencion di CEMEDAR ta pas den e vision y maneho di Minister Endy Croes. Asina por ayuda y detecta loke e atleta tin prome cu e yega na AZV. ‘E tabata un bon reunion y CEMDAR por conta cu sosten di Ministerio di Deporte’, e mandatario e finalisa.
