Ministro di Husticia cu anuncio grandi Dialuna awo relaciona cu permiso di trabao na Aruba

Ministro di Husticia cu anuncio grandi Dialuna awo relaciona cu permiso di trabao na Aruba

Medida nobo na caminda

  • Free for All di manicuristanan den SPA lo bay stop tambe 

ORANJESTAD (AAN): Ministro di Husticia Arthur Dowers, a confirma cu Dialuna awor nan lo ta haciendo anuncio grandi di medidanan nobo cu ta wordo introduci pa cu personanan stranhero buscando permiso di estadia y trabao na Aruba.

   “Otro siman nos lo tin un conferencia di prensa unda nos lo anuncia medidanan nobo cu nos ta bay tuma, pa asina por yuda diferente companianan na Aruba cu ta den necesidad grandi,” ta loke Ministro Dowers a indica den un entrevista cu DIARIO.

   Ministro sa cu tin hopi hende local cu ta keda keha cu nan no por haya trabao, pero despues ta haya sa cu simplemente nan ta nenga di bay labora den cierto sector... e ora e ta creando un imagen cu tin ‘desempleo’ riba e isla, siendo cu ta buscando hende di exterior.  Bo ta hayabo e ora cu varios hende ta protesta (incluyendo oposicion), siendo cu ora MEP ta den Gobierno nan ta laga tur hende drenta sea ta legal of ilegal, y no ta preocupa cu nada.  Pero awor cu Ministro Dowers tin un ‘maneho’, oposicion ta protesta.

   Loke mester realiza particularmente ta e maneho den pasado di Dowers tabata exitoso, pasobra hopi caminda a pusha bek riba presencia di hopi indocumenta, e presencia di hendenan cu por traha pero no a haya chens debi na reglanan.  Pero ta mira awo cu e grupo di hendenan cu por y kier traha, practicamente ta tur ta laborando aworaki.

   Pesey awor Ministerio a dicidi cu ta bin cu un maneho unda ta facilita pa e organizacionnan por keda draai pa asina nan no mester cera, y Dialuna lo anuncia e maneho nobo aki.

   Segun e titular di Husticia, a bisa cu nan a stop e parti di “importa hende pa loco”.  Nan no a para cu un forma controla, pues ora cu a anuncia cu tin mester di koki, carnicero, y panadero... tur e permisonan ey a wordo duna.  Tabatin mester di hende pa cuida adulto mayor na cas, tur esey a wordo habri pa trece yudansa di exterior.   Segun Dowers, nunca esey a wordo para tampoco.

   DIMAS a duna OK pa esnan cu mester di opleiding, tambe casa di trahadornan cu permiso por a bin, a kita e prohibicion pa hende local pa laga nan casa of pareha bin Aruba numa.  Tur di nan pues a bira disponibel y a bay riba mercado laboral tambe.

   “Nos a duna oportunidad na tur hende cu tabata indocumenta, y cu a cumpli cu rekesitonan di e.o. no ta criminal, etc., pa awor wordo admiti den mercado laboral, y nos ta satisfecho cu esey a tuma lugar, y awor nos ta bay anuncia ki paso nos ta bay tuma,” Ministro Dowers a splica.

   Trahadornan di SPA: Tin hopi keho cu trahadornan importa pa traha na SPA, ta haci maluzo di e permiso unda ta busca 10 persona pa bin haci manicure y pedicure den SPA, pero despues di 6 luna of 12 luna nan ta kita di trabao, y nan mes ta bay habri nan propio SPA.

   DIARIO a compronde cu esaki a sali asina hopi for di man, te cu Dialuna awor pa e sector aki tambe lo bin cu medida nobo, esta cu e permisonan pa esnan cu ta bin traha awor pa haci trabaonan asina pa SPA, lo bay tin validez di solamente 2 aña.  Tin di keda pendiente awo Dialuna pa e anuncio.