ORANJESTAD (AAN): Minister di Enseñansa Endy Croes a reuni cu director Señora Els van Homelen y Sr. Dennis Conradus di Stichting Voor Verstandelijk Gehandicapten Aruba (SVGA).
Director di Dienst Uitvoering Onderwijssubsidies (DUOS) Sr. Hervé Ruiz tambe tabata presente den e ocasion aki. Durante e reunion a dialoga tocante algun peticion pendiente di SVGA. A haci un peticion special pa un programa di LVS Doen In, cual ta un programa traha specialmente pa tipo di scolnan aki. E mandatario di Enseñansa a indica cu e programa aki tin su gastonan cu ne y tabata buscando espacio pa acomoda esaki y a priminti di lo yega na un solucion pa esaki.
Ademas di esaki, pa e prowise borden cu SVGA a ricibi den e proyecto di Edutech di Futura, mester un persona interno cu por atende y maneha esaki. SVGA tin e personal adecua y a presenta un solucion budget neutral, pero tin mester un aprobacion pa por logra haci esaki di tal manera.
Durante e reunion a informa e mandatario di Enseñansa cu AFAS Software Aruba a yuda nan pa traha un tuinhuis, specialmente pa e tipo di scol aki. Final di augustus lo bolbe reuni pa sigui avansa, soluciona y clarifica tur aspecto pa cu aña escolar nobo 2024-2025 por continua sin ningun inkietud. Finalmente, e mandatario di Enseñansa ta informa cu e opendag di SVGA lo tuma luga dia 19 di september 2024 y ta invita Pueblo di Aruba pa pasa bishita e scol.
