Na 1986 DIARIO a adverti pa economia agita sin control di seguridad
*Falta di personal ta e sintoma principal di economia desproporcional
*Ministronan di Labor y Economia mester salba economia democratico
ORANJESTAD(AAN)—Den un sistema democratico, tur loke ta cualifica como maneho di un pais, mester sirbi e bienestar di e ciudadano directamente.
E ciudadano ta e accionista mas grandi den e loke nos ta yama Gobierno, cu ta realmente e personanan cu Pueblo ta eligi pa dirigi e pais como un empresa cu mester duna resultado positivo pa tur ciudadano.
E bienestar di un ciudadano ta wordo sirbi directamente cu e oportunidad pa e por pone su pan di cada dia riba mesa y por goza di tur loke ta base di felicidad di su Pueblo.
Economia di un pais mester garantisa actividadnan, cu ta permiti e poblacion di un pais, goza di un entrada financiero cu ta permiti pa e haci e gastonan necesario cu un bida aceptabel, ta exigi.
Mester tin suficiente trabou pa garantisa entrada pa e trahador, tanto den empleo di otro persona of a base di empleo propio.
Ora papia di suficiente, mester papia di e cantidad necesario pa por mantene e motor di economia den funcion. Por tin un grupo di reserva.
Sinembargo, mescos cu falta di trabou ta crea problema, falta di trahador tambe ta crea problema.
Pa comprende loke falta di trahador por ocasiona, mester tira un bista riba e situacion cu ta presenta na cantidad di pais grandi na mundo, incluso Hulanda, caminda migracion a bira un desastre social, cu ya no ta sirbi e exigencianan mara na balor di hende.
Un economia cu no ta di acuerdo cu e base productor di un pais, ta crea situacionnan explosivo pa motibo di demandanan cu finalmente ningun pais cu ta sobrecarga cu migracion, por honra.
Na añanan ochenta, ora a base di e salida di Lago, a amplia e sector di turismo na Aruba cu velocidad enorme, nos a lansa advertencia serio pa loke awe ta bati na porta di Aruba, un isla, cu no por ni sikiera conquista otro pais pa e aumenta su terenonan disponibel pa acomoda exigencianan economico y loke un Pueblo mes mester pa e por funciona.
Awe mester aplaudi e hecho cu porfin Gobierno di Aruba ta duna Pueblo e prueba cu e conoce e problemanan di Aruba y a traha riba solucion pa e problema cu turismo a crea riba tereno di demanda di trahador.
Cada trahador cu mester wordo importa, manera semper DIARIO a splica, ta drenta cu un pakete basico di exigencia cu e comunidad mester honra.
Covid-19 a duna prueba con di un momento pa otro, Gobierno di un pais mester ta hasta capaz pa yuda un poblacion alimenta su mes, pasobra economia y trabou a wordo descontinua pa salba bida di hende.
Covid-19 a confirma pues loke na 1986 tabata e punto di preocupacion di DIARIO, cu a adverti pa controla e crecemento economico di Aruba y e cantidad di proyectonan cu ta wordo construi.
Awe porfin Ministro Dangui Oduber ta enfrenta realidad y ta anuncia un paro di proyectonan hotelero y asina porfin ta crea e base, cu ta garantisa cu economia di Aruba ta sirbi e comunidad, pero no ta causa problema cu e pais no por soluciona.
E decision di Ministro Dangui Oduber ta bini na momento cu Ministro Glenbert Croes, tambe a trece dilanti cu mester bay atende cu e necesidad di personal y den esaki mester bay anima awor Arubianonan cu por bay reforza e forza laboral di Aruba, cu ta esencial den crecemento economico.
E pregunta cu semper DIARIO a haci ora a anuncia otro proyecto turistico tabata, con ta percura pa suficiente trahador y con ta percura pa Aruba tin suficiente espacio pa proyectonan wordo ehecuta pero tambe pa hende hiba un bida na nivel cu espacio pa e hende mes y tur loke e mester pa e comunidad funciona.
Aruba porfin conoce gobernantenan cu ta entrega contesta na e problemanan serio di e pais, cu porfin conoce un Gobierno, cu na un forma responsabel ta atende cu economia di e pais, cu no por bira productor di problema pa un Pueblo!
E proyectonan cu Aruba lo por introduci mester ta di acuerdo cu loke Aruba por carga pa asina segura bienestar di e pais, bienestar di e poblacion, cu segun democracia mester ta den balanza pa e hende, e ciudadano, por ta feliz.
E realidad awe di Aruba, cu comercio na careda pa trahador, Gobierno na careda pa traha Ley, mester sirbi como ehemplo pasobra awe Aruba ta cera e circulo di loke a cuminda na 1986 cu creacion di un economia desproporcional, fuera di regla.
