ORANJESTAD (AAN): Recientemente e Ministro dinamico di Deporte, Gerlien Croes tabata na Republica Dominicana,
pa apoya su yiu homber Terrence kende ta forma parti di seleccion di Aruba den e Little League International Baseball Classic U10.
Esaki no ta un biahe di trabao, pero el a dicidi pa bay mira y apoya su yiu Terrence. Na su yegada, autoridadnan na Santo Domingo a ricibi Ministro Gerlien Croes cu braza habri, y el a hasta haya un plaquette di reconocemento na Republica Dominicana, pa loke e ta haci pa e muchanan, deporte, y apoyo na hubentud. E ta gradecido na Pimentel Baseball Academy, y tambe World Organization of Baseball pa e grato momento y reconocemento aki.
Tambe den fin di siman, Ministro Croes a probecha di e momento ey pa haci un bishita na e conocido ‘Fortuna Academy’ pa mira algun di e hobennan di Aruba cu ta sigui training di Baseball eynan.
Fortuna Academy a habri algun siman pasa na provincia San Pedro de Macoris, y ta consisti di un fenomenal compleho di Baseball. E ta un proyecto cu ta dedica pa hobennan, pa asina no djis desaroya nan den e wega, sino sigura nan cu nan tin un bon educacion y tur training necesario. E ta basa riba e sistema Mericano di yuda hobennan mehora den Baseball. E lo bay impacta hopi bida, y nan lo haci cambionan grandi.
Tin varios Scouts caba di Teamnan di Major League cu tin nan bista riba Fortuna Academy aki. Riba e potret aki por mira Ministro Gerlien Croes, y mas na man drechi tin Jose Fortuna.
