Mientras Fraccion di Raiz ta exigi reunion den Parlamento pa trata matrimonio di mesun sexo
ORANJESTAD (AAN): Otmar Oduber ta expresa cu na Aruba loke mester rigi y manda ta democracia. Si tin un parlamentario of minister ta bisa cu su pensamento y creencia no ta permiti y kier vota contra mantrimonio di mesun sexo, esey ta su derecho. Pero ta su principio y integridad si e ta keda sostene of ta bandona gobierno.
“Ey ta caminda cu bo ta haya cu e parlamentarionan kier sconde tras di religion y ta bisa cu no ta di acuerdo pasobra su religion no ta permitie, e tin e derecho constitucional pa bisa cu e ta contra di dje, pero bo mester bisa tambe cu bo no por ta parti di un gobierno cu si ta di acuerdo cu ne”.
Oduber ta bisa cu e por a mira un carta di dos miembro di un partido di coalicion, Raiz den e caso aki, bisando cu nan ta boga pa e ley di matrimonio di mesun sexo wordo pasa. Si mañan e ley wordo vota contra den Parlamento, esey ta significa cu nan mester saca nan conclusion si ta sigui sostene e gobierno of no. “Ey ta caminda e sapato ta preta. Tur hende ta hiba tur sorto di excusa rond, pero e dolor ta cu e stul ta dushi y nan no kier yega na e discusion, mescos cu otro partidonan den Parlamento, tanto den coalicion como den oposicion”.
Continuando, Otmar ta bisa cu ora un gobierno bay casacion pasobra ta contra veredicto di hues den hof, caminda den hoge beroep ta bisa cu personanan di mesun sexo tin e derecho di casa, esey kiermen cu gobierno ta contra matrimonio di mesun sexo. E ora e dos miembronan di fraccion di Raiz, mester saca nan conclusion, pasobra de lo contrario nan no ta sincero cu comunidad di Aruba y no tin principio tampoco. Esaki debi cu partido Raiz ta den Conseho di Minister, Srs. Ursell Arends y Geoffrey Wever ta sinta eyden y a sostene pa bay Hulanda, bringa e caso aki mientras cu e dos miembronan di Fraccion di e mesun partido Raiz, ta bisa cu nan SI kier pa e ley pasa.
Finalisando Otmar Oduber ta bisa cu ta trata aki di un discusion di principio basa riba un democracia cu mester respeta,
