ORANJESTAD (AAN): Ministerio Publico a exigi Diahuebs un castigo di prison di 5 aña contra e ex-minister di Infrastructura y actual miembro di Parlamento Benny Sevinger.
Na opinion di Ministerio Publico, Sevinger a haci su mes culpable di soborno, estafa di Pais Aruba, abuso di funcion, labamento di placa y malversacion.
Ademas Ministerio Publico a exigi cu S. ta worde saca for di e passief kiesrecht y cu e ta perde e derecho pa cubri cualkier puesto, pa e periodo maximal.
Si Corte sigui e exigencia aki di Ministerio Publico esaki lo ta pa un periodo di 10 aña.
Tambe lo cuminza un procedura di ontneming contra dje pa un total di casi un miyon Florin, (esta 914.651,72 Florin).
Cu Sevinger a “laga su mes worde cumpra”, a shock comunidad di Aruba gravemente. El a haci Pais Aruba daño y esey Ministerio Publico ta tene hopi na malo.
Ministerio Publico a exigi tambe castigonan incondicional contra cinco otro sospechoso.
Contra e sospechoso P.T.A. Susebeek, ex-ambtenaar di DOW, Ministerio Publico a exigi un castigo di prison di 4 aña pa soborno y labamento di placa. Banda di esey a pidi e verbeurdverklaring di un suma di placa di 1.3 miyon Dollar cu a worde tuma den beslag na un banco na Curaçao.
Segun Ministerio Publico, P.T.A. Susebeek ta esun cu a saca e probecho ilegal mas grandi den e investigacion Avestrus. El a probecha di su relacion cu e minister y a enrikece su mes a costo di e comunidad di Aruba.
Contra e sospechoso Leoncita Arends Ministerio Publico a exigi un castigo di prison di 3 aña y e boet maximo di 25.000 Florin. Leoncita ta worde acusa di a estafa Pais Aruba via varios proyecto y di soborno di e Minister.
Ministerio Publico a exigi castigonan di prison di 2 aña y e multa maximo di 25.000 Florin contra e sospechosonan Carlo R. Mansur, Edgar R. Werleman y Ninosca D. Nuñez. Nan tambe ta worde acusa di estafa y falsificacion. E sospechoso N. a worde condena anteriormente den e caso Ibis.
Contra e sospechoso F.F. Abath di DIP a exigi seis luna di castigo di prison. Contra e otro sospechosonan a exigi trabao pa comunidad y multanan.
Ministerio Publico a pidi vrijspraak den e caso contra sospechoso E. Biemans.
E defensa di abogadonan di e sospechosonan lo tuma lugar otro luna december. Corte lo dicta sentencia na inicio di aña 2023.
