Relato anual di 2022
ORANJESTAD (AAN): E siman aki, Ministerio Publico a publica nan Relato Anual di 2022 y den esaki a ripara mesora cu nan ta poniendo awor mas atencion riba e.o. criminalidad contra medio ambiente.
Segun Ministerio Publico, na aña 2022 ora cu nan a caba di traha cu tur e restriccionnan imponi door di Pandemia di Covid-19, nan a bay bek na e trabao estilo ‘normal’ bek. Pero e procesonan nobo di trabao manera pagonan online y haci cita (introduci den 2020 y 2021) a keda wordo manteni debi cu e adaptacionnan aki di trabao a haci e tareanan hopi mas eficiente y mihor pa publico. Pesey mes e peticionnan pa declaracionnan di conducta ta socede awor completamente online y e rijnan largo di hendenan para pafo durante Pandemia, ta pertenece na pasado.
Ministerio Publico ta trata di adopta un maneho mas transparente cu prensa. Pesey awor nan ta comunica mas regularmente cu prensa, compara cu antes. Esaki no ta djis trata di casonan, sino tambe di decisionnan, por ehemplo por corda riba un decision intermedio relaciona cu e dump na Parkietenbos, cu tabata topico di hopi controversia.
E hefe di prensa di Husticia ta suministra entrevista regularmente riba casonan importante na e periodistanan di Corte. Internamente e cosnan a cambia tambe. E maneho pa prensa awor ta parti habitual di hopi reunion di consulta, tanto di prome como segundo linea. E vocero ta participa awor den e reunionnan aki, y hunto ta yega na acuerdonan riba e enfoke riba prensa. E transparencia pa cu ciudadanonan ta importante aki, te asina leu cu e caso ta permiti esey.
E lucha riba criminalidad contra medio ambiente tin atencion di Ministerio Publico. Pa por actua eficazmente contra esaki, lo tin di impone legislacion medioambiental nobo. Pa por multa esnan cu comete infraccion, ta esencial no djis e derecho penal sino, principalmente, e aplicacion di derecho administrativo di e ley medioambiental.. Pa por actua integralmente contra esaki lo bay ta mas eficaz.
Durante 2022, Ministerio Publico a cita dos sospechoso pa presenta pa un TOM-zitting relaciona cu candela cu nan a start riba dump di Parkietenbos dia 18 di Januari 2022. E sospechosonan a bay di acuerdo cu castigo di 120 ora trabao comunitario, cu 2 aña di prueba. Ministerio di Integridad, Transporte y Naturalesa a haci denuncia na Januari 2022 di esey. Den e anochi di 16 pa 17 di Augustus 2022 un biaha mas tabatin candela riba dump. Di e candela intencional ey, Serlimar a haci denuncia di dje na Polis.
E denuncia di un habitante di Parkietenbos riba e decision di Ministerio Publico pa no procesa esey cu tabata sigui usa e incinerator na dump y cu no a bay pa persigui nan debi cu no tin un hindervergunning pa dump, a wordo rechasa dia 29 Augustus 2022 door di Corte Superior.
Su keho tambe di no persigui ni procesa e siguiente kehonan, a wordo rechaza door di Corte Superior.
Na comienzo di 2022, Ministerio Publico a notifica e habitante di Parkietenbos cu e decision pa bay Corte cu e caso aki lo keda suspendi te cu Januari 2023 pa asina duna pais Aruba e chens pa tuma medida pa pone dump cumpli cu ley.
