Ministro Ursell Arends:
ORANJESTAD (AAN): ‘Pasadia’ ta e nomber di e facilidadnan unda cu adulto mayor por bin pasa nan dia y disfruta di un ambiente social y activo. Pues for di oranan di mainta te cu final di atardi adultonan di 60+ ta bon bini pa tuma parti den actividadnan, conbersa of simplemente relaha na ‘Pasadia’.
E iniciativa aki ta nace door cu no tin suficiente capacidad di cuido pa adulto mayor ariba nos isla. Esaki ta haci cu hopi persona di e tercera edad y nan familiarnan ta worde confronta cu retonan grandi. Deterioracion fisico y mental, dificultadnan financiero y stress sicologico ta algun di e impactonan cu nos ta observa den nos comunidad door falta di cuido adecua.
Proyecto Pasadia lo sirbi manera un gran alivio na nos sistema di cuido atendiendo un grupo grandi riba lista di espera di SABA y den futuro pa adulto mayor cu kier mantene nan mes fisica- y socialmente activo.
Durante e segundo edicion di Foro Nacional pa Adulto Mayor, Minister Arends a anuncia cu a firma un Intentieverklaring cu various stakeholder local pa haci Proyecto Pasadia un realidad. SABA, FCCA, Cas Marie, Buurtzorg Caribbean a haci espacio disponibel pa e proyecto y ta mustra entusiasma pa traha hunto riba esaki. Club Kibrahacha lo hunga un rol y tambe Wit Gele Kruis (WGK), cual ta ofrece chekeo medico.
"Un parti clave den e vision pa Adultonan Mayor ta e principio di de-medicalisacion, un cambio pa un manera mas humano y social den nos interaccionnan cu adultonan mayor y nan cuido. E vision aki ta subraya e esencia di trata adultonan mayor cu e dignidad y compasion cu nan merece," Minister Arends ta remarca.
