Infraccionnan ta minimal:
*Demas productonan ta cay bao mercado liber
ORANJESTAD (AAN) – Den entrevista cu Minister Geoffrey Wever, Titular di Economia, el a elabora tocante e kehonan cu tin riba abuso cu prijs, cu ta tumando lugar na diferente supermercado, y hopi consumidor ta puntra unda e control a keda.
Esaki, segun e mandatario ta un percepcion, pero no ta e realidad, pa loke ta trata e macuto basico, cu tur dia ta wordo controla.
Wever a splica cu tin ambtenaarnan di Departamento di Economia, cu tur dia ta controla e negoshinan y miles di control ta tumando lugar pa añanan, y e infraccionnan ta minimal.
E dignatario a señala cu tin un percepcion den e comunidad cu tin abuso cu prijs, pero e unico productonan cu gobierno por controla ta e canasta basico, unda ta stipula prijs maximo, y e mandatario a indica cu gobierno tin tur informacion.
Recientemente, Parlamentario Berlis a haci minister di economia e pregunta tocante esaki, y el a dune tur informacion, na unda por wak cu tin miles di control ta tuma lugar pa aña, esta 60 mil control, y e infraccionnan ta minimo, e mandatario a reitera. El a agrega cu e tipo di infraccion ta chikito y no tin un patronchi.
Minister Wever a indica tambe cu tin un app unda e consumidor mes por controla e prijs di e producto tambe. E app por wordo uza den tur supermercado pa canasta basico, y tur otro producto, manera ta bon conoci, ta di mercado liber unda cu gobierno no tin influencia riba dje.
E mandatario a haya comentario cu tin negoshinan cu no ta poniendo prijs, y esey si no ta permiti, pero pa prome biaha el a scucha esaki. No obstante, e ta bay papi’e cu Departamento di Asuntonan Economico, pa wak kico e situacion ta.
