Na lugar di cobra e publico un tarifa direct:
ORANJESTAD (AAN) – Minister Ursell Arends, Titular di Transporte Publico, den entrevista cu DIARIO a mustra cu no tin intencion di cobra e turistanan (y publico en general) un tarifa direct, pa uza e tram (cual por cierto, ta e deseo di varios ciudadano pa gobierno haci), pero e ta haya cu ta miho reintroduci e sistema di CPF cu tabata tin den pasado.
Arends a declara pa DIARIO cu den diferente ocasion el a bisa cu no mester a traha tanto Arutram ni tanto Aruparking. Pone nan den un NV riba nan mes y saca nan for di Arubus, y mirando tambe e doorlichting cu a tuma lugar, e ta bisa cu no necesariamente e tram mester ta bao Arubus, pasobra e ta un peso financiero riba e compania aki.
E mandatario a indica cu den pasado tabata tin un CPF (Cruise Passenger Fee), cu tabata colabora cu US$1.30 pa cada turista crusero, y esaki ta negociacionnan cu ta andando, y e ta spera cu di parti di partnernan cu mester colabora cu esaki, sostene esaki pa haci e operacion di Arutram tambe sostenible.
“Mi ta mira cu den pasado a contempla e posibilidad tambe pa cuminza cobra e turistanan pero mi no ta kere esaki ta e manera pa bay, pero CPF manera tabata anteriormente, mi ta sinti cu ta mas facil. Esaki ta negociacionnan cu ta tumando lugar pa yega na combersacionnan concreto, riba e tema aki” e dignatario a declara.
Minister Arends a subraya cu e trahadornan di Arutram ta entusiasma cu e decision pa core bek den centro di ciudad, y e ta kere cu ta bay tin algun cambio den nan forma di opera tambe. El a bisa cu e ta prefera pa laga e Manager di Arutram mes elabora riba esaki, Dialuna proximo, 31 di Juli, ora e tram ta cuminza core bek den Caya Betico Croes.
