*A adkiri varios Inspector pa reforza DTP
ORANJESTAD (AAN) — Minister demisionario, Ursell Arends, titular di Transporte Publico, Naturaleza, Integridad y Asuntonan di Adulto Mayor, a tene un encuentro na DTP, relaciona cu Dia Internacional di Transporte Publico, cu tabata Diadomingo 10 di November, pero a keda celebra Dialuna 11 di November ultimo.
E mandatario tabata hunto cu Departamento di Recurso Humano (DRH) y Departamento di Transporte Publico (DTP).
Den un entrevista cu DIARIO tocante e logronan cu a tuma lugar na DTP y kico mas tin pa futuro, el a relata:
“Riba e dia aki nos a enfoca riba e importancia di transporte publico, pero mirando cu e dia internacional a cay riba Diadomingo, a dicidi di celebr’e dialuna 11, conhuntamente cu tur empleado di transporte publico. A combina esaki cu un tayer di trabao, p’asina aki destaca e importancia di transporte publico na Aruba”, e dignatario a bisa.
Minister Arends a expresa cu transporte publico ta impacta e bida di tur hende cu ta forma parti di nos comunidad, for di e muchanan cu ta uza transporte publico pa por yega scol, e adulto mayor cu ta depende di transporte publico pa nan movecion den e comunidad, te tur e empleadonan cu ta haci uzo di transporte publico pa por yega nan destino, pa yega na pia di trabao.
“Mi ta kere cu mester gradici tambe e team di DTP cu ta haci esaki posibel, no solamente pa zorg pero tambe pa otorgamento di vergunning por tuma lugar, den un forma debido”, e mandatario a bisa. Gobierno a cuminza inverti den DTP no solamente cu capital humano, dus di atrae hendenan nobo pa forma parti di e ekipo. DTP a haya varios Inspector nobo, pa garantiza cu nan por brinda e servicio. Pero tambe a digitalisa DTP completamente. Nan a lansa e website nobo, y aworaki nan ta den e trayecto pa digitalisa tur e procesonan pa yega na un vergunning y esakinan ta adelanto pa garantiza cu transporte publico no solamente ta accesibel, pero pa loke ta trata e parti di vergunning cu esaki ta keda transparente.
“Esaki ta dos aspecto cu mester wordo garantiza y mi ta kere cu e team di DTP ta haciendo un tremendo trabao y awe mi tey pa celebra hunto cu nan e dia aki y, pa asin'aki, hunto cu DTP engrandece transporte publico na Aruba”, e dignatario a subraya.
E Minister a agrega cu DTP ta den un proceso aworaki unda a zorg pa nan forma parti di un task force, cu a wordo lansa cu participacion di OM, KPA, Departamento di Impuesto, DTP mes y nan ta trahando mas cerca cu otro, pa asina e parti di “have having” tuma lugar. “Y aworaki tambe nos a tuma un proceso di zorg pa e Inspectornan di DTP traha den picket regeling, no solamente den ora di oficina pero tambe den oranan di atardi-anochi, pa asin'aki e control ta mas frecuente. Nos ta tambe den e proceso di educa tur e inspectornan pa nan tambe por yega na e B.O.A, pa nan haya mas autoridad pa actua ora tin infraccionnan den transporte publico”, Minister Arends a duna di conoce.
