*A defini tres obhetivo di maneho di desperdicio
ORANJESTAD (AAN) – Diamars atardi, Minister Ursell Arends, titular di Transporte, Medio Ambiente, Integracion y Asuntonan di Adulto Mayor, a dirigi na pueblo den un conferencia di prensa, den cual a lanza e continuacion di e campaña “Maneho di Desperdicio”.
El a recorda cu e campaña aki a cuminza na inicio di aña, pero Diamars a lanza e meta y amplifica e actividad pa na un forma responsable, atende cu maneho di desperdicio.
E dignatario a bisa cu e meta di e campaña aki, tambe ta toca nos normanan y balor, individual y colectivo pero tambe cultural pa loke ta concerni dicho maneho.
OBHETIVONAN:
Minister Arends a bisa cu tin tres obhetivo principal cu ta e siguientenan:
- Conformidad cu APV (Algemene Politie Verordening).
“E cumplimento di APV ta esencial pa e prevencion di sushamento y creacion di dumpnan ilegal. Tur desperdicio ta propiedad y responsabilidad di su doño, y no cumpli cu ley ta bin cu consecuencianan”.
- Un Aruba limpi:
“Un sociedad cu un calidad di bida halto y un economia prospero mester di un medio ambiente saludable. Nos tur tin un rol pa hunga y cada un di nos tin un responsabilidad, incluyendo bishitantenan riba nos Isla”.
- Educa publico en general riba separacion di desperdicio:
“Separacion di desperdicio ta reduci contaminacion ambiental y ta yuda e procesamento responsible di materialnan”, e dignatario a subraya.
Minister Arends a señala cu riba un Isla manera Aruba, tur loke ta wordo importa ta end up un caminda, y pa esaki, e separacion di desperdicio ta bay reduci e contaminacion ambiental y tambe ta yuda procesa desperdicio na un forma responsabel y tambe ta bay crea materialnan cu por wordo uza, sea localmente of materia prima cu nos por exporta.
E Logo ta titula “Limpi limpi” y e minister a splica cu entre otro e ta representa tur loke nos ta haci riba tera y cu ta afecta lama tambe. E blachinan berde ta representa naturaleza y ta recorda nos cu naturaleza semper tey presente y tarea di gobierno y comunidad ta, preserva esaki tambe.
E Dignatario a señala cu prome cu continua cu e campaña mes, e siman y lunanan nos dilanti, y lo bay tin diferente actividad cu lo wordo lanza bao di e tres obhetivonan cu ya caba a wordo menciona, y cu lo wordo anuncia den su debido tempo tambe.
