Ta busca formanan di cooperacion cu por ta beneficio pa Aruba
ORANJESTAD (AAN)/Den Haag – Minister Plenipotenciario mr. Ady Thijsen ta sigui cu su encuentronan pa busca cooperacion cerca municipionan na Hulanda y asina a haci un bishita na burgemeester di Tilburg Theo Weterings.
Den su introduccion Minister Thijsen a trece dilanti su vision y maneho pa haci Aruba mas visibel na Hulanda. No solamente na Den Haag, unda e Gobierno di Hulanda ta sinta, pero tambe cu e municipio y provincianan. Asina e la papia di e cinco pilarnan cu su maneho y vision ta concentra riba dje.
Banda di Den Haag y e municipionan, ta busca acercamento cerca institutonan, Hogeschool y Universidadnan. Tambe den su contactonan cu embahadanan, Minister Thijsen ta busca formanan di cooperacion cu por ta beneficio pa Aruba. Por ultimo Minister Thijsen a bisa cu Arubahuis ta pa e comunidad Arubiano na Hulanda. Den cuadro di esaki e mandatario a puntra burgemeester Weterings con e situacion pa cu camber/vivienda pa studiante ta na Tilburg.
Sr. Weterings a contesta cu e situacion na Tilburg ta igual cu otro ciudadnan cu hopi studiante na Hulanda y cu esaki tin un prioridad halto cerca e gobierno municipal di Tilburg. E reto segun burgemeester Weterings ta pa haya localidad pa construi mas vivienda pa studiantenan. Burgemeester Weterings a bisa cu den e asina yama Kenniskwartier na Tilburg West tin espacio pa construi 25 mil vivienda, un gran parti pa studiantenan.
Den su combersacion cu Minister Thijsen, e burgemeester a bisa cu Tilburg tabata conoci pa e industria di textiel. Despues cu e industria aki a cera, Tilburg a conoce hopi desempleo. Loke a pasa ta cu Tilburg a scohe aspectonan importante di e industria di textiel y a haci bon uso di e tecnica aki. Tambe a crea un sector hopi fuerte den metal y tambe transporte y logistico. Banda di esaki Tilburg ta inverti hopi den companianan cu ta desaroya tecnologia nobo. Tilburg a bira grandi riba e tereno di tuinbouw y vooral e “sierteelt” cu ta wordo exporta rond mundo pa enbeyesa plazanan y hardinnan.
Minister Thijsen a bisa cu Aruba tambe a scohe pa e caminda di tecnologia innovativo y nobo, manera e uso di LNG y seguidamente pa hidrogeno cu e establicimento di un Hydrogen Valley na Aruba cu mester bira e trendsetter pa e region di Caribe y Latino America.
Burgemeester Weterings a invita Minister Thijsen pa bin un biaha mas Tilburg den forma di un bishita di trabao, unda elo por mustra Minister Thijsen e cambionan cu a tuma lugar na Tilburg. Tambe den cuadro di esaki lo ta bon pa bishita algun institutonan di enseñansa na Tilburg.
Minister Thijsen a gradici burgemeester Weterings pa e invitacion y e recepcion ameno den stadhuis di Tilburg y a entrega un regalo na sr. Weterings como recuerdo di e bishita di minister Thijsen na e burgemeester di Tilburg.
E potretnan ta cortesia di Arubahuis
