*E dignatario ta sigura cu lo tin un investigacion riguroso
ORANJESTAD (AAN) – Minister di Husticia Demisionario, Señor Rocco Tjon, a expresa palabranan di condolencia y forza, na e famianan di e hoben cu a perde su bida e siman aki y cu e ta considera como un caso sumamente lamentable. Den entrevista cu DIARIO, e dignatario a declara lo siguiente:
“Mi por sigura cu lo tin un investigacion riguroso ta bay tuma lugar, pa wak kico por a sosode. Esaki ta den man di Landsrecherche. Despues di e sucedido mi tabata den contacto mesora, cu Alto Mando di Cuerpo Policial, nan a sigura mi cu Landsrecherche a wordo notifica, pues lo tin investigacion cu ta bay tuma lugar, y na mesun momento nan lo brinda nan zorg na e agentenan policial envolvi”, Minister Rocco Tjon a bisa.
Esaki pasobra e ta un caso lamentable pa tur hende cu ta envolvi den esaki. E dignatario por a compronde cu Alto Comisario a bishita e famianan di e hoben. “A hiba un bon combersacion y a splica nan tambe full e proceso aki pa nan tin comprension con e proceso aki ta bay tuma lugar”, Minister di Husticia a señala, indicando cu esaki ta bay tin hopi atencion di banda di su ministerio y na su debido tempo nan lo informa comunidad riba esaki tambe.
E mandatario a sigui relata cu ora nan a wak e proceso, t’asina cu no por tolera amenazanan contra autoridad.
“Mi por compronde cu ta un caso fastioso, cu a lanta hopi emocion cerca famianan pero tambe cerca nos comunidad y p’esey mes nos a enfoca hopi riba e proceso y e investigacion cu ta bay tuma lugar. Pero di otro banda tambe, nos lo duna atencion debido na amenazanan cu ta wordo haci contra nos agentenan policial; pasobra esey, den un estado di derecho simplemente nos no por, y lo nos no mester kier tolera tampoco” e dignatario a remarca.
