*Gobierno no tin intencion di stop operacion di UTV of ATV
ORANJESTAD (AAN): E origen di preocupacionnan cu a surgi den e dianan aki relaciona cu acceso na cierto ruta pa tour guides y operadornan di UTV y ATV, Minister di Vivienda, Infrastructura, Servicio Interno y Telecomunicacion, Rene Herdé, a tuma iniciativa pa reuni cu e sector y atende e situacion den un ambiente di dialogo habri.
Algun operador a expresa nan malcontento publicamente den media. Gobierno ta comprende e preocupacion cu cualkier cambio cu por afecta un ruta di tour por causa entre empresarionan y trahadonan den e sector. P’esey, desde cu e situacion a presenta, Minister Herdé a busca pa atende e asunto cu prioridad y crea espacio pa scucha e diferente partidonan envolvi.
Minister Herdé kier aclaria cu Gobierno no tin intencion di stop operacion di UTV of ATV, ni di elimina trabou di ningun persona den e sector. E meta ta pa yega na un maneho balansa, cu ta tene cuenta tanto cu continuidad di actividad economico como cu e otro interesnan cu mester considera den uzo di e area.
E situacion cu a genera e preocupacionnan a surgi debi na un caso lanta di parti ABC contra Gobierno pa pone fin na e tour- of operacionnan di UTV y ATV. Gobierno, sinembargo, a reconoce e impacto cu e situacion por tin pa e sector y a actua pa busca un solucion practico y tene na cuenta e interes di tur partido envolvi.
Como parti di e solucion, Departamento di Obra Publico (DOW) y Departamento di Infrastructura y Planificacion (DIP) a traha riba un ruta alternativo, cu intencion di ofrece un solucion cu por mantene acceso necesario y na mes momento atende e situacion cu a presenta.
Dialogo cu e sector
Diabierna 4 di september, Minister Herdé lo tene un “Encuentro cu Minister” cu companianan y operadornan concerni. E encuentro lo tuma luga di 2:00 PM pa 4:00 PM na John F. Kennedy Education Center, cu intercambio di informacion riba ruta pa UTV como tema central.
E reunion ta brinda oportunidad pa e operadornan comparti nan preocupacionnan, experiencia y sugerencianan directamente, mientras Gobierno por informa riba e pasonan cu ta tumando y e alternativa den preparacion y kita tur mal informacion circulando.
Pa Minister Herdé, dialogo ta esencial specialmente ora un decision of situacion por tin consecuencia pa personanan y organisacionnan cu ta depende di un sector como nan entrada. E intencion no ta pa cera porta, sino pa sinta na mesa, scucha e sector y busca un solucion balansa y realistico.
Gobierno ta consciente cu tour guides y operadornan di UTV y ATV ta forma parti di e actividad turistico y economico di Aruba. E proceso cu ta sigui awo ta enfoca riba yega na un alternativa cu ta tene cuenta cu e diferente interesnan, sin perde di bista e personanan cu nan trabou y nan pan di cada dia cu ta conecta directamente cu e actividad aki.
