Den cuadro di Dia di Mucha:
ORANJESTAD (AAN) – Minister Presidente, señora Evelyn Wever-Croes, a referi na e Dia Internacional di Derechonan di Mucha, cu ta wordo celebra awe, Diaranzon 20 di November 2024.
“Mi lo kier enfoca riba e necesidad y importancia pa nos adultonan proteha nos muchanan, duna nan lo miho cu nos por brinda nan pa nan por tin un fundeshi firme, p’asina nan por ta exitoso den nan bida. Den e cuadro aki, nos ta pensa riba e sosten positivo y encurashamento cu nos tin cu duna nos muchanan, yuda nan desaroya nan talentonan, nan habilidadnan, busca ayuda cerca otronan, den famia of amistadnan. Mi ta pensa cu tin hopi hoben cu ta bon den deporte, baile, arte, pero no tur ora mayornan tin tempo pa hiba e muchanan e lesnan aki. Claro, poco poco nos kier inclui nan mas den e curriculum di scol, pero lo ta bunita si nan por haya oportunidad pa desaroya esakinan tambe”, e dignatario a señala.
Minister Presidente a reitera cu e kier a enfoca riba proteccion di nos muchanan, pero lamentablemente e casonan di abuso y abuso sexual di muchanan ta continua.
“Expertonan ta bisa mi cu esey ta pasobra nos ta kibrando e tabu. Mas hende ta papia. Pues no necesariamente, e ta pasando mas cu antes, pero awo mas hende ta papia di dje y esey ta un bon señal. Di otro banda, ya nos a fortifica full e cadena cu tin cu atende, duna sosten tanto na e mucha cu ta e victima, como na su famia y tambe pa atende cu investigacion pa coi e abusador, pa nos por yega e momento cu e caso ta trata door di e Huez e ta bon hinca den otro pa Huez por yega na castigo mas halto”, Minister Presidente a señala.
El a agrega cu e castigonan a wordo aumenta caba, awo nan ta mas halto y na mesun nivel cu Reino, aunke no esnan mas halto na mundo, pero mester yega unda Hueznan por dicta castigonan mas halto.
“Pero na fin di dia loke expertonan ta bisa nos ta cu den 99% di e casonan di abuso sexual di mucha, e abusador ta un persona cerca di e famia. Cerca di e mama, cerca di e tata un familiar, un amigo, y esey nan tin cu bin cu ley cu ni kico bo haci por influencia esey. Pero di otro banda, nos tin cu purba preveni. Y p’esey ta importante pa nos cada un realiza e proteccion di nos muchanan, na ki edad cu nan ta, ta den nos man como adulto y por fabor ban haci lo maximo posible pa nos proteha nan di e predadornan cu ta cerca di nos mes, y cu nos mes ta laga nan drenta den e bida di nos muchanan”, Minister Presidente a enfatiza.
