_large.jpg)
*Y cu costo di bida a aumenta hopi na Aruba!
ORANJESTAD (AAN) – Minister Presidente Evelyn Wever Croes, den entrevista cu DIARIO relaciona cu un reunion cu e tin pendiente cu e sindicatonan, tocante e tema di indexering, entre otro, a admiti cu berdad ta cu e empleadonan publico no a haya indexering pa hopi tempo y cu costo di bida a subi hopi ultimo añanan, y cu mester yega na otro na un forma con pa compensa e trahadornan di sector publico, p’ esey.
E mandatario, papiando di transparencia di su ingresonan, a agrega cu desde cu CAft a cuminza, cada cuartal gobierno tin cu publica su cifranan, el a bira mas transparente y mas bisto.
“Den cada cuartal reportage bo ta haya hopi informacion, y claro e punto culminante di cuanto bo a gasta ta ora bo cuenta anual ta wordo aproba pa Parlamento. Eynan nos tin atraso. Minister Xiomara Maduro a caba di entrega esun di 2019 na Contraloria General, y aworaki tin un plan con pa elimina e atraso ey. Di awo pa un aña nos tin cu ta full bij. Esey ta e punto mas culminante bo por bisa di e transparencia di bo cifranan. Mas cu esey bo no ta haya ni un caminda. Pero na Aruba, apesar cu nos no tin cuenta anual aproba pa Parlamento ainda, nos tin e cuartal rapportnan cu ta na CAft, y CAft ta duna su opinion riba nan”, Premier Wever-Croes a remarca.
El a agrega cu e rapportnan aki ta wordo publica y tempo cu Aruba tabata den covid y cu nos mester a dialoga cu sindicatonan tambe, gobierno a comparti mas informacion pa nan. “Pero mi ta kere cu e cuartal rapportnan ta duna un bon bista y pa cuenta anual mester warda un tiki mas; pero, mester papia si di structura, kico ta loke nos kier, pasobra gobierno ta pasahero, pero pa sindicatonan si nos por yega na un palabracion cu tur hende sa adelanta cu esaki ta e procedure cu pa nan ta miho y pa tur gobierno ta miho”, e dignatario a reitera.
E ta spera cu haya lihe e nomber di e delegadonan di sindicatonan pa sinta na mesa pronto.
