Na forma virtual
ORANJESTAD (AAN): Minister Xiomara Maduro di Cultura tabata tin e honor di dirigi algun palabra durante e apertura di e “Semana de Integracion Cultural y Lingüística con el Gran Caribe”, cu ta tuma luga dianan 10 pa 13 di september 2024 na Riohacha, Colombia. Durante e siman aki e linguista sr. Ramon Todd Dandare tabata un invitado special pa ofrece algun tayer y charla tocante di Papiamento.
Den su discurso Minister Maduro a acentua e lasonan estrecho cu ta existi desde miles di aña entre Aruba y Tiera Firme na unda e lama Caribe ta conecta y facilita nos comunicacion cu otro y e migracion entre e continente y e islanan. E distancia a facilita lasonan comercial, social y cultural entre e pueblonan te dia di awe, y e evento di e siman di integracion cultural y linguistico cu e Gran Caribe, ta prueba di e lasonan aki.
E mandatario a splica cu e presencia di sr. Ramon ‘Monche’ Todd Dandare ta simbolisa na perfeccion e lasonan fuerte cu ta existi entre Riohacha/ La Guajira y Aruba. Ramon ta un Riohachero di nacimento y un Arubiano di formacion cu atraves di su trabaonan y personalidad a sa di alimenta e spirito historico, social, cultural y linguistico entre nos pueblonan, locual ta contribui na e integracion di e Gran Caribe.
Na final di su discurso Minister Maduro a gradici sr. Ramon Todd Dandare y organizacion pa e bunita intercambio cultural aki y a dirigi su mes den nos dushi Papiamento na tur cursista pa desea nan un siman frutifero yena di hermandad.
