ORANJESTAD (AAN) – Minister di Labor, Energia y Integracion, Glenbert Croes, a elabora tambe tocante e tema energetico,
den conferencia di prensa gubernamental, di Dialuna di e siman aki, na unda a enfoca y duna un actualizacion riba e proyectonan di Eagle LNG y Aruba Hydrogen Valley.
E dignatario a señala cu Aruba su maneho di energia ta enfoca riba durabilidad, sostenibilidad, accesibilidad y calidad.
“Mi kier pa pueblo sa cu nos ta comprometi, mirando e proyectonan cu nos ta realizando di Eagle LNG, Accion Energia, e parkenan di mulina di biento, e parkenan solar, nos ta bayendo acelera pa cumpli cu e metanan di reduci e emisionnan di CO2. E metanan pa 2030 pa evita e calentamento global, nos ta bib’e tur dia, e calor ta mas fuerte cu nunca, obviamente e ta un refleho di rond mundo, kiermen cu e cambio climatico ta un asunto cu mester atencion di henter mundo y Aruba con chikito cu e ta, nos kier duna ehemplo cu nos accionnan y mustra mundo cu nos ta cumpli cu e Acuerdo di Paris, di reduci nos dependencia como pais, na loke ta petroleo y crudo”, e mandatario a bisa.
El a agrega cu den e transicion aki Aruba su inversionnan ta bay ta grandi no solamente riba tera pero tambe off shore, riba lama, cu e realizacion di e proyecto LNG, y tambe introduccion di e energia hidrogeno cu realizacion di e proyecto Aruba Hydrogen Valley.
E mandatario a bisa cu e update cu el a ricibi como Minister di Energia, ta mustra cu LNG ta den full compliance cu suministra tur informacion na e departamentonan concerni, sea cu permisonan rekeri di DOW of cu e ta bay precario na DIP, DNM pa loke ta regarda medio ambiente, DJWZ ora yena asina leu di pidi hinder vergunning , etc. Y tambe e hecho importante cu nan mester a haya aprobacion di Ministerio di Defensa di Hulanda pa loke ta trata e cooperacion pa pasa e tubonan cerca of abao di tera cu e base di Mariniers Kazerne na Savaneta y mester a haya aprobacion pa loke ta e “pipe plannernan”. E mandatario ta contento cu esaki pasobra asina ta bay avanza. E dignatario a bisa cu e ta haya comentarionan di hende cu ta esceptico cu esaki ta tardando hopi, pero e minister su splicacion pa nan ta cu esaki ta e prome biaha cu un proyecto di e indole aki ta wordo realiza na Aruba, por locual tur hende mester a tuma un tiki mas tempo pa evalua, procesa, y sigura cu e proyecto aki wordo implementa na un forma exitoso, safe, y sin lugar na duda esaki ta hopi importante.
Pa Gobierno di Aruba, pa Pais Aruba, e introduccion di LNG ta sumamente importante, pa suministra gas natural na WEB Aruba NV, y asina laga e dependencia riba heavy fuel oil y esey lo yuda enormemente na estabiliza y reduci prijs di consumo di awa y coriente. Minister Glenbert Croes a subraya cu loke a sali publica cu te 2050 prijs di awa y coriente lo no por baha, no ta corecto.
