ORANJESTAD (AAN): Dialuna mainta durante un conferencia di prensa, minister di Integracion Glenbert Croes a duna un splicacion amplio riba e caso di Ariel Lopez,
kende tabata den detencion debi na e hecho cu e ta na Aruba ilegalmente.
E mandatario na dado momento a duna orden pa Lopez wordo laga den libertad debi na e hecho cu su peticion pa haya permiso ta andando.
Dialuna el a duna un splicacion mas amplio riba esaki.
Segun Croes, Lopez (’e tata’) ta un stranhero cu a drenta Aruba dia 07-11-2019 cu objetivo di estadia turistico y ta mantene un relacion sentimental cu Sra. Rosaura Miguelina Groeneveldt (e ‘mama’), naci na Aruba dia 18-08-1995.
28-01-2020 ta entrega un peticion di estadia, como personal domestico (huishoudelijk
personeel) pa Lopez, cu a wordo nenga dia 21-04-2020. Lopez a apela y riba 16-11-2020 e apelacion a wordo declara nulo:‘ongegrond verklaard’.
Mientras tanto, di e relacion afectivo aki a nace un yiu: Jeremias Mariano Groeneveldt
a nace 19-03-2021 (e ‘yiu’). Despues di nacemento di e baby a cuminsa cu e proceso di establece paternidad via DNA test, pa asina e tata por a oficialmente reconoce su yiu.
Una vez cu e resultado a drenta di e DNA test a bai over pa reconoce e yiu riba 05-07-2021.
E mandatario a splica cu despues di esaki e pareha a acudi na DPL pa solicita un asina yama notificatie brief, caminda nan a wordo notifica cu mama y tata mester tin asina yama ‘gezamenlijk gezag’ pa bay over na duna e notificatie brief.
Mas o menos mesun temporada cu a entrega e peticion pa gezamenlijk gezag na Corte, e tata a wordo deteni door di GNC pasobra durante un control di trafico ta resulta cu e no tin status legal.
Croes a sigui bisa cu remarcabel ta cu na GNC mes nan ta manda e mama na un“abogado” cu supuestamente por yud’e saca e pareha for di GNC.
Dia cu e caso di e solicitud pa gezamenlijk gezag ta wordo atendi, Lopez no ta haya permiso di GNC pa atende e tratamento na corte.
E mama ta aparece su so y a splica e situacion na Corte.
Asina el a logra nan atende e caso, unda cu a logra obtene gezamenlijk gezag despues di cual finalmente a logra entrega e peticion pa un permiso di estadia a base di ‘bijzondere band met Aruba’ (laso special cu Aruba) dia 12-12-2021.
Sinembargo, prome cu esey, door cu GNC a detene Lopez caba, a drenta un veredicto di huez
pasobra Lopez a entrega un asina yama ‘voorlopige voorziening’ pa schors e werking di e decision
di deportacion door cu e lo trece un desventaha inhusto pa Lopez.
E huez a cuminza na bisa cu e decision y consideracion di huez den casonan asina ta di caracter provisional y temporal.
“Mester enfatisa cu e decisionnan den casonan asina, caminda ta trata decision riba un peticion pa un medida temporal y provisional, e decision di huez tambe ta uno provisional ya cu e decision por cambia den caso cu circumstancianan cambia, manera por ehempel e momento cu e permiso wordo otorga”, segun e mandatario.
El a sigui bisa cu maneho di gobierno actual no ta solamente un maneho dirigi riba admision so, sino
tin tambe como meta pa promove integracion den un fase mas trempan posibel di e estadia di e persona riba nos isla.
“Cu otro palabra nos ta brinda e oportunidad y apoyo na e stranhero cu a demostra di kier biba y traha riba nos pais e oportunidad pa contribui na, y forma parti integral di, e desaroyo di nos comunidad. Obviamente esaki ta conta pa esnan cu kier haci di Aruba nan hogar, contribuyendo di e forma ey tambe na e obligacionnan cu ta bin cu un estadia legal”, Croes a sigui bisa.
E minister a sigui bisa cu e maneho di admision y integracion di e gobierno actual ta un maneho enfoca riba un maneho controlable y eficiente pero tambe humano, transparente y cumpliendo cu tratadonan internacional y derechonan humano.
El a enfatisa cu e maneho di admision y integracion di pais Aruba ta wordo determina door di Gobierno, specificamente door di e minister di Integracion.
E ta cay bou e competencia di e minister concerni, di acuerdo cu su maneho, pa determina no solamente e maneho general pero tambe determina, tanto den casonan general y excepcional, ki ora pa otorga un permiso. Cu esaki de consideracion a reactiva e comision di conseho di admision y deportacion: Adviescommissie Toelating en Uitzetting (ATU).
“Conhuntamente cu colega minister di Husticia a bin cu instruccionnan di maneho conhunto pa determina e maneho actual encuanto admision y deportacion, di acuerdo cu e vision di ambos minister”.
Manera e huez a enfatisa den su decision provisional/temporal durante e caso di Ariel Lopez, su decision (i) ta regarda un peticion pa un medida provisional y temporal,
(ii) ta basa riba e dossier manera cu e a ricibi y no por exclui cu ta carece di documentonan cu por a haci cu el a yega na un otro decision, y (iii) ta temporal ya cu ainda mester worde determina door di minister di integracion si e persona en cuestion ta bin na remarca pa un permiso di acuerdo cu su maneho, segun e mandatario.
Croes a indica cu Ariel Lopez no a haci un peticion pa permiso di trabou, tabata a base di ‘laso special’ cu Aruba’ ya cu e ta conta cu su famia y un hogar aki na Aruba.
Sr. Lopez a haci varios intento di legaliza su estadia na Aruba den pasado y den presente, y tabata durante e proceso aki cu el a wordo deteni door di GNC. E minister a sigui bisa cu e mester remarca cu Sr. Lopez a
(i) cana e proceso completo debidamente,
(ii) a entrega su peticion na DIMAS pa un permiso,
(iii) a cumpli cu tur e rekisitonan pa cu e peticion aki segun e maneho vigente, y
(iv) ta bin na remarca pa un permiso di estadia di acuerdo cu e maneho existente di admision y integracion, pa cual motibo a bay over na honra su peticion.
