ORANJESTAD (AAN): Minister di Educacion, mr. Gerlien Croes, ta expresa su orguyo y ta desea tur clase di exito na studiantenan di Colegio EPI cu a sali rumbo pa Europa
pa participa den un intercambio educacional y pasantia internacional danki na e programa Erasmus+ (Plus). E oportunidad aki ta representa un paso importante den e desaroyo academico y personal di nos hobennan.
Den e ultimo periodo, un total di 34 studiante di Colegio EPI a sali pa exterior pa haci nan pasantia den paisnan manera Irlanda, Belgica y Spaña, entre otro. Tur e studiantenan cu ta participa den e proyecto aki ta studiante cu ta cerca di gradua y cu ya tin experencia den nan ramo di estudio.
Minister Gerlien Croes ta subraya cu e participacion den Erasmus+ ta contribui directamente na e crecemento internacional di nos studiantenan y ta permiti nan pa amplia nan conocemento, habilidadnan y vision riba mercado laboral. E ta enfatisa cu e experencia cu nan ta gana den exterior lo wordo treci bek Aruba, na beneficio di nos comunidad y desaroyo di nos isla.
Colegio EPI ta un institucion oficialmente acredita pa Erasmus+, cual a permiti cu e aña aki studiante di tur cuater unit di EPI por participa den e programa. E meta pa e proximo añanan ta pa sigui amplia e alcance di e intercambio educacional, cu un obhetivo di manda mas studiante pa Europa y fortalece e posicion di educacion profesional na Aruba.
Ademas di Erasmus+, tambe tin colaboracionnan cu partnernan den sector priva y hotelero, manera Iberostar, cu ta brinda oportunidadnan adicional pa pasantia tanto den e Caribe como na Europa. Esaki ta demonstra e balor di colaboracion publico-priva pa crea oportunidadnan concreto pa nos hobennan.
Minister Gerlien Croes ta expresa su gratitud na tur e partnernan cu ta contribui na realisacion di e pasantianan internacional, y ta reconoce e papel fundamental di e mayornan cu ta sostene y motiva nan yiunan durante e trayecto aki.
Gobierno di Aruba ta sigui compromete su mes pa fortalece educacion, internacionalisacion y oportunidadnan pa desaroyo, pa asina prepara nos hobennan miho pa futuro y pa e demanda di un mundo cada biaha mas global.
