Durante su bishita oficial na Hulanda
ORANJESTAD (AAN): Durante su prome bishita oficial na Hulanda como Minister di Relacionnan den Reino, Educacion, Hubentud, Innovacion y Deporte, Minister Gerlien Croes a realisa un serie di encuentronan exitoso y rondanan di introduccion strategico, enfoca riba fortalecemento di e laso institucional y e bienestar di studiantenan Arubiano na Hulanda.
Un di e momentonan central tabata e reunion cu e ‘mentornan’ encarga pa vang op y guia nos studiantenan Arubiano for di e momento cu nan yega na Hulanda. Minister Croes a reconoce cu nan rol ta fundamental den e proceso di adaptacion, sosten emocional y exito academico di cada un di nos hobennan na Hulanda.
Pa haya un bista completo di e parti operacional di sosten educativo, Minister tambe a realisa un reunion cu e empleadonan di Departamento di Asuntonan di Enseñansa di Gabinete di Aruba. Durante e combersacion, a trata topiconan importante manera: e plannan actual, desafio cu e equipo ta enfrenta, sosten necesario, y e vision pa futuro. A pone enfasis riba cooperacion structural y e importancia di adaptabilidad den e servicio cu e departamento ta brinda.
Minister Croes a extende palabra di gradicimento na Directora Joselin Croes y e team completo di e departamento pa nan apoyo, guia y claridad durante su bishita.
Cu vision fiha, minister lo ta trahando den e temporada venidero riba creacion di miho structuranan y metodonan cu por sostene nos mentornan y empleadonan den nan funcion cu ta esencial.
