ORANJESTAD (AAN): Gobierno di Aruba, por medio di Minister di Finansa y Asunto Economico, mr. Geoffrey Wever,
a logra un paso estrategico pa fortalece e sector di Empresanan Chikito y Mediano (MKB) cu introduccion di e Borgstelling MKB-kredieten Aruba, Curaçao y Sint Maarten (BMKB ACS). Siman pasa durante e bishita di Staatssecretaris Van Marum, Staatssecretaris Van Marum, Promer Minister Mike Eman y Minister Wever a firma un documento pa anuncia e areglo di garantia aki.
E areglo nobo di garantia, inspira riba e exito di e modelo Hulandes, ta duna institucionnan financiero mas seguridad ora nan ta otorga un prestamo, creando mas oportunidad pa empresarionan cu no tin suficiente garantia. E meta ta pa elimina e obstaculonan pa crecemento, stimula renobacion y fortalece e base di nos economia.
Minister Wever a enfatisa: "E empresanan chikito y mediano ta e ‘backbone’ di nos economia. Cu e areglo di garantia nos ta pone un instrumento concreto den man di nos empresarionan, pa nan por inverti cu confianza, innova cu curashi y contribui na un futuro sostenibel pa Aruba. Esaki ta un ehempel claro di colaboracion constructivo den Reino, cu resultadonan real pa nos ciudadanonan."
Cu entrada di e areglo di garantia, Rijksdienst voor Ondernemend Nederland (RVO) lo por formalisa acuerdo cu banconan y otro institucionnan financiero na Aruba. Esaki lo acelera acceso na capital y crea un ambiente empresarial mas dinamico y competitivo.
"Nos ta traha pa un Aruba caminda cada emprendedor (chikito of mediano) tin e mesun oportunidad pa prospera. E acuerdo aki ta un paso mas den e direccion corecto pa diversifica nos economia y proteha e bienestar economico di nos isla pa generacionnan cu ta bin," minister Wever a conclui.
