ORANJESTAD (AAN): Den un reunion diahuebs 1 di februari 2024, Minister Geoffrey Wever a tene un prome encuentro oficial cu e hunta di supervision nobo di Camara di Comercio.
E encuentro aki a subraya e compromiso di tur partido involucra pa fomenta un ambiente colaborativo. "Camara di Comercio ta un partner importante pa por impulsa e agenda economico di Aruba", segun e mandatario.
A discuti varios punto di importancia durante e reunion manera colaboracion entre diferente sector, iniciativanan internacional pa inversion, retonan cu (falta) cantidad di trahador, y incentivonan economico cu por traha riba dje, entre otro.
Minister Geoffrey Wever ta optimista tocante e opportunidadnan di esfuersonan colaborativo. Despues di un aña cu algun logro concreto, ta premira cu hunto cu Camara di Comercio lo amplia esfuersonan pa sigui promove comercio y crecemento economico di Aruba. Tur esaki ta posibel basa riba un plan strategico, colaboracion firme den region y un compromiso pa enfrenta desafionan economico directamente."
"Mi kier felicita e board nobo, y ta desea Sr. Diederik Kemmerling hopi exito y iluminacion den su rol como presidente nobo y Sr. Robert Croes den su rol como vice presidente nobo. Tur clase di exito na e board completo, esta Monica Kock, Gavril Mansur, Eugene Farro, Derrell Maxwell y Omar Tromp. Camara di Comercio su board tambe ta conta miembronan nobo ta sr. Devaney (Dave) Martinus y sra. Nathalie Moore."
"Tambe kier a gradici presidente saliente, Sr. Gavril Mansur, pa su esfuerso y input valioso durante e ultimo aña. Sr. Mansur su cooperacion y entusiasmo sigur a yuda nos logra diferente meta, pa cual nos ta sumamente agradecido. Tambe un danki na Sra. Monica Kock kende a fungi como vice-presidente, y miembronan saliente manera Eugene Farro, Lay Hing de Kort-Yee y Wanda Broeksema pa nan aporte."
"Sr. Mansur y su board tabata un partner strategico, cu a dunami consehonan valioso y a yuda nos logra cosnan importante pa sector comercial, manera e.o e Trade Mission pa Colombia, y tambe e Business to Business Matchmaking entre comercio di Aruba y di Venezuela y hopi mas" - Minister Geoffrey Wever.
