Prijs y Obtenibilidad:
ORANJESTAD (AAN): Produccion local di webo di galiña no ta suficiente pa abastece e consumo cu tin na Aruba pa webo. Debi na esey e Departamento di Asuntonan Economico, Comercio y Industria (DAECI) ta duna permiso pa importacion di webo.
Den e ultimo lunanan e produccion local a conoce un reduccion. Coincedentemente e ultimo lunanan e prijs di webo importa procedente di Merca tambe a aumenta drasticamente, cual a pone e importadornan local busca alternativa for di e.o. Colombia.
Webo ta un cuminda esencial, un fuente di nutricion valioso. Mirando e situacion di obtenibilidad local y prijs internacional (Merca), minister di Finansa, Asunto Economico y Sector Primario, Geoffrey Wever, a otoroga permiso pa importa webo for di e.o. Colombia cu a resulta den un efecto positivo riba obtenibilidad y prijs pa consumido na Aruba. Esaki tabata tin un gran acohida di atencion den media y den comunidad.
"Tabata un paso necesario mientras nos ta preparando pa implementa un maneho pa empuha e produccion local di webo di galiña" - minister Geoffrey Wever.
Webo ta unico producto na Aruba cu tin proteccion di mercado.
Bo no por importa webo sin un exoneracion di Ministerio di Asunto Economico conforme Landsbesluit invoerverbod kippeneieren; esaki ta pa proteha e productor local di webo.
Webo produci na Aruba ta color bruin y e prijs pa un docena di webo local ta Afl. 6,80. DAECI ta duna permiso pa importa unicamente webo blanco asina e consumido por diferencia e webo local for di esun importa. DAECI ta evalua e cantidad di webo cu por wordo importa cada trimester a base di e cantidad cu ta wordo produci localmente y por varia depende di e situacion di mercado.
Prijs di webo importa tin un margen di ganashi maximo
Pa webo importa, e margen di ganashi ta 50 cen pa docena pa groothandel ("whole sale"), y pa kleinhandel ("retail") e ta 60 cen pa docena. E prijs di webo importa ta varia pa importador y ta fluctua pa cada cargacion segun e pais, marca, fecha y cantidad cu drenta.
Si ta nota cualkier iregularidad den supermercado, por tuma contacto cu DAECI na 521-2420.
