“Big Dreams, small steps” na Santa Ana Scol
*Den cuadro di e Metanan di Desaroyo Sostenible
ORANJESTAD (AAN) – Minister di Economia, Comunicacion y Desaroyo Sostenible, Geoffrey Wever, tabata na Santa Ana Scol, lansando un campaña di concientizacion pa hobennan, basa riba e “National Children Savings Program” cu gobierno ta desaroyando pa siña e muchanan pa spaar, unda nan famianan por yuda nan pa spaar.
“Nos no tin e cultura mas di spaar pa futuro, y nos ta kere cu ta importante pa concientiza nos hobennan cu si desde hobennan nan cuminza spaar, ora nan ta adulto, nan tin un ‘start capital’, cu por yuda nan duna un adelanto den bida. Den cuadro di SDG y di desaroyo sostenible, y tambe pa crea un ciudadano cu ta, financieramente, mas stabil nos ta pensa cu ta bon pa stimula spaarmento bao nos hobennan, y nos a dicidi di lanza un campaña, y awe nos a lanza e campaña na Santa Ana Scol. E campaña ta yama ‘Big dreams, small steps’.
Pues, caminda cu nos kier pa nos hobennan bira conciente cu si nan spaar poco, poco, di jong, ora bo ta mas grandi bo tin un capital pa cuminza, e por yuda bo sea un auto di segunda mano, of por ta un laptop, un viahe pa studia na Hulanda, e por ta tur sorto di ayudo cu por haci e ciudadano mas fuerte para den su zapato”, Minister Geoffrey Wever a señala.
El a reitera cu Aruba no tin e cultura ey mas. Antes desde jong e ciudadano tabata traha pa tin su propio cas, y esaki ta un bunita parti di Aruba su cultura, cu e kier enfoca riba dje, p’asina crea un ciudadano cu ta lanta miho para y por enfrenta futuro, na un forma mas ekilibra. “Nos ta bishitando scolnan tur siman. Mi tin casi 30 scol cu mi ta bishitando, dunando presentacion tocante e Metanan di Desaroyo Sostenible, unda cu nos ta papia di e transicion di energia, educacion, pobreza, retonan cu nos pais ta encontra, y cu nos ta trahando riba dje. Awe, nos a probecha di lanza e campaña aki, y e posternan ta bay tur scol unda cu nan ta pidi mayornan tambe pa sigui e campaña y pa 15 di November, e hobennan por entrega un carta di motivacion riba e idea cu nan tin di spaar, y pakico nan lo kier spaar, y e tres miho motivacionnan lo bin na remarca pa haya un premio di 250 florin, como incentivo pa sigui spaar, pero e mester bay riba un cuenta di spaar di e hoben”, Minister Wever a duna di conoce.
E dignatario a splica cu den e “National Children Savings Program” nan ta dispuesto pa na dado momento habri un cuenta di spaar pa tur e hobennan na Aruba, den colaboracion cu tur e banconan, y esey lo bira parti di e maneho cu a wordo prepara, aproba door di Ministerraad, y aworaki ta bay den ehecucion.
