ORANJESTAD (AAN): Ministerio di Finansa, Asunto Economico y Sector Primario Geoffrey Wever ta informa cu Gabinete AVP-FUTURO
riba 23 di juni 2026 lo defende e “Landsverordening Algemeen Investerings- en Ontwikkelingsfonds” (“AIOF”) den Parlamento. Crea un fondo di inversion ta prioridad di maneho number 5 manera indica riba pagina 4 di Programa di Gobernacion AVP- FUTURO 2025- 2028. Desde cu Gabinete AVP-FUTURO a inaugura Minister Geoffrey Wever a cuminsa traha riba e ley pa institui e fondo di inversion AIOF, cu awo a yega Parlamento pa wordo trata y asina ta cumpli cu e compromiso politico pa crea e fondo na bienestar di Aruba.
Como parti di e proceso legal prome cu tratamento di e ley den parlamento, Gabinete AVP-FUTURO riba diamars 16 di juni a entrega su contestacion riba 229 preguntanan di Parlamento riba AIOF, e prome fondo di inversion di Pais Aruba.
Presupuesto di Pais Aruba ta un instrumento esencial den proceso pa facilita y stimula Aruba su desaroyo. Via e post “Kapitaalinvesteringen” gobierno ta aloca sumanan publico pa inversionnan. Te cu awo, Aruba no ta dispone di un instrumento financiero mara na un Agenda di Inversion a largo plaso. Pesey Gabinete AVP-FUTURO tin como prioridad crea un fondo di inversion pa facilita inversionnan a largo plaso y riba areanan di maneho manera renobacion urbano, enseñanza y innovacion, transicion di energia, resiliencia climatico, E-goverment, vivienda duradero, infrastructura y crea sectornan economico nobo manera agricultura comercial, FINTECH, industria creativo y economia blauw.
Pa financia e AIOF, Gobierno di Aruba lo aloca e fondonan publico necesario via e presupuesto. Parlamento como e organo mas halto di nos pais, ta keda cu e tarea constitucional pa autorisa e fondonan. E fondo ta haci posibel contribucion financiero directo di manera entro otro Hulanda y Union Europeo. Creacion di e AIOF tambe ta ofrece e cuadro legal pa incorpora fondo adicional cu por resulta di entre otro refinanciamento di debe na tasanan di interes mas abao, den e cuadro di e HOFA. Di e manera aki, e fondo lo sirbi como un instrumento legal y di maneho pa facilita inversionnan strategico y a largo plaso na bienestar y desaroyo di Aruba.
Compromiso di Gabinete AVP-FUTURO ta keda ehecucion di Programa di Gobernacion AVP- FUTURO 2025- 2028. Creacion di un fondo di inversion y agenda di inversion ta crea confianza cu fondonan publico ta wordo inverti na bienestar di Aruba segun minister Geoffrey Wever.
Gabinete AVP-FUTURO ta invita tur hende pa sigui e reunion publico den parlamento riba 23 di juni 2026.
