Cu artistanan Levi Silvanie y Janiro ‘Ataniro’ Eisden como protagonista
ORANJESTAD (AAN): Diaranson durante un conferencia di prensa minister di Enseñanza Endy Croes a anuncia lansamento di un proyecto pa scolnan secundario yama ‘School Tour’, pa crea concientizacion riba salud mental y salud personal.
Durante e conferencia di prensa e mandatario a trece dilanti cu e proyecto ta uno hopi bunita y importante.
“E protagonistanan principal den e proyecto aki ta e artistanan conoci Levi Silvanie y Janiro ‘Ataniro’ Eisden”.
Esaki ta un proyecto musical pa crea concientizacion riba salud mental y cuido personal na scolnan secundario, segun Croes.
E mandatario a splica cu den luna di November di 2022 el a haya un yamada pa bay wak un presentacion y Friso Veenman a bin cu e proyecto aki y a splica con e ta hinca den otro.
Un di e partinan cu Veenman a splica ta cu atravez di musico e hobennan por habri mas y expresa nan mes mihor, pa conta di nan problema.
Segun Croes, e proyecto ta bay ta riba 3 mainta pa e muchanan di scol, mientras cu lo tin sessionnan tambe pa adultonan.
“E team ta consisti entre otro di representantenan di Respaldo, AZV, Patientenraad, GGZ y Stichting Hunto”. E ta un otro manera pa nos por tackle e problema di salud mental. Ta un problema cu despues di e pandemia nos a haya mas conocimento di dje tambe, segun Croes.
El a sigui bisa cu quizas awor e muchanan ta ‘open up’, mas facil asina.
Segun e mandatario, tin hopi mucha cu por ta biba den trauma y problema y no sa cu kende nan papia y con nan trece esaki dilanti.
“Mi ta contento cu no ta solamente mi ministerio di Enseñanza y Deporte a braza e proyecto aki, sino mi colega minister di Asuntonan Social Rocco Tjon tambe ta duna su aporte na e proyecto aki”.
Hunto nos por atende cu e problema di salud mental na diferente manera, segun e mandatario.
El a splica cu riba 16, 17 y 18 di October ta bay tin 3 mainta unda cu School Tour ta bay ta activo na Filomena College, Maria College y Colegio Arubano.
Esey ta e tres prome scolnan cu lo forma parti di e proyecto, unda cu ta bay tin cantamento, pero papiamento tambe.
