ORANJESTAD (AAN):Minister di Turismo y Salud Publico, Sr. Dangui Oduber a pasa bishita e oficina di Visitor Information Center (VIC)
y ta anuncia tur e proyectonan y desaroyonan cu lo contribui positivamente na e economia di San Nicolas.
Den e maneho di Minister Dangui Oduber diferente proyectonan y eventonan pa San Nicolas ta consisti di:
Reapertura visitor information center (VIC).
Masterplan di Sero Colorado
Proyecto embeyecimento Baby Beach Fase 1-2-3.
Renobacion trapi Rodgers Beach.
Proyecto embeyecimento Rodgers Beach.
Island Festival.
Art week, September 2-8.
Murals San Nicolas TPEF-Artisa.
Despues cu e VIC na San Nicolas a keda renoba y activa conforme e maneho di turismo, por a mira hopi movecion di turistanan cu ta bishita e oficina di turismo pa obtene informacion di kiko tur San Nicolas tin di ofrece. E oficina ta fungi como e curason y centro di informacion pa turista na San Nicolas unda nos bishitantenan por disfruta di “walking tours” y tambe por siña mas di nos dushi isla.
E continuacion di e proyectonan ta inclui diferente aspecto. Entre otro proyecto di embeyecimento y mehoracion di Baby Beach cu a entrega fase 1, 2 y pronto lo entrega fase 3. Fase 3 lo encera e construccion di kiosconan, move e turtle wall pa haya un extension di e beach y drecha e canchanan di tennis y converti nan den canchanan deportivo multifunctional y cu por bin un restaurant chikito eynan cu cuminda tipico di Aruba.
E master plan pa Sero Colorado pa Rodger’s Beach lo consisti di construccion di un boardwalk (voetpad cu ta bai conecta e parkinglot nobo di baby beach te na final di Rodgers Beach cu e intencion ta conecta e voetpad Rodgers Beach y Baby Beach. Alaves ta bay amplia e beach pa haci esaki mas grandi pa mas hende por haci uzo di dje y lo construi un parkinglot nobo, palapanan nobo y extra Hut nobo. Naturalmente lo mehora e landscaping y trece modular toilet.
Minister Dangui Oduber ta contento cu tin “Island Fest Aruba” na San Nicolas. Island Fest Aruba ta un celebracion inolvidabel pa nos bishitante y localnan, unda nan por bin experiencia e esencia di nos localnan. Minister Dangui Oduber ta contento cu e festival aki lo tuma lugar tur ultimo diaranson di luna den e districto di San Nicolas. San Nicolas ta considera como e capital di cultura, y lo tin e honor di host e evento principal aki cu ta celebra Aruba su herencia y alaves ta famoso pa su murayanan yena cu artenan colorido.
Finalmente, Minister Dangui ta expresa e importancia di e proyectonan aki paso nan ta conforme nos maneho y vision. Gobierno tin un rol hopi importante pa hunga ora ta papia di economia di pais aruba y desaroyo na San nicolas. Y nos a demostra cu hechonan, cu accionnan, cu inversionnan cu nos ta kere den e desaroyo na San Nicolas. San Nicolas tin tur e potencial pa haya su fair share den e desaroyo di nos pais.
