ORANJESTAD (AAN): Dialuna mainta a firma un acuerdo via cual lo haci un renovacion di Museo Arqueologico National Aruba (MANA), unda cu e proyecto lo wordo financia pa Tourism Product Enhancement Fund (TPEF).
Durante un conferencia di prensa minister di
Turismo Dangui Obuber a bisa cu TPEF ta un fondo cu ta haci inversion den ‘upgrading’ di e producto Aruba y ta inverti entre otro den nos herencianan cultural y ta percura tambe pa mantene nos costanan limpi.
“TPEF pa algun tempo caba ta haci diferente proyecto importante pa nos turismo”.
Nos maneho di turismo ta dirigi pa trece turista afluente, diversifica nos turismo, haci inversionnan continuo den e producto Aruba y tambe percura pa nos tin un turismo sostenible, segun Oduber.
E mandatario a sigui bisa cu nos herencia cultural ta sumamente importante pa nos turismo.
El a splica cu turistanan mas y mas no ta bin solamente pa nos bunita beachnan, nos clima, seguridad y nos hendenan, sino nan ta bin pa un experiencia total.
“Cultura ta un parti importante den e experiencia cu nos kier brinda na nos turistanan y ta pesey ora e ‘board’ di TPEF a wordo acerca pa Museo Arqueologico cu un plan bon prepara, TPEF tabata habri pa cuminza financia varios fase di e proyecto”.
E ta un master plan integral cu na final di dia mester percura ta tin un galeria moderno di arte caminda cu por tene exposicionnan pa localnan y tambe nos bishitantenan, segun e minister.
El a sigui bisa cu e museo aki ta wordo bon bishita pa nos turistanan y cu pesey ta importante tambe pa haci inversionnan pa por tin un galeria moderno di arte, caminda cu por tene exposicionnan y comparti asina e experiencia di nos historia y nos cultura cu nos bishitantenan.
“E proyecto aki ta un di e fasenan cu ta bay wordo realiza”.
Mi a compronde cu ta parti di e dak di e edificio ta bay wordo renoba, despues di cual lo bin otro fasenan cu ya caba a wordo presupuesta pa e fondo di TPEF.
Nos a compromete nos mes caba cu nos ta bay sigui duna cooperacion na e embeyecimento, upgrading y mehoracion di nos Museo Arqueologico Nacional, pa asina nos tin un facilidad cu ta conforme e maneho cu nos ta hiba, cu tin un bon infrastructura y un bon Museo Arqueologico Nacional cu e turistanan por experiencia, segun Oduber.
El a gradici tur esnan cu ta bay haci e proyecto aki posibel.
