11 gazebo y 3 palapa lo wordo drecha
ORANJESTAD (AAN): Diahuebs mainta Minister Dangui Oduber a tene un conferencia di prensa na Mangel Halto hunto cu representantenan di Fundacion Parke Nacional Aruba y Oficina di Turismo.
Eynan a presenta un otro proyecto den cuadro di mehoracion di producto Aruba y di 'upgrade' di e infrastructura.
Pa hopi tempo caba, e palanan y a gazebonan na Mangel Halto ta den mal estado. Algun di nan a wordo vandalisa. Ministerio di Turismo y Oficina di Turismo a tuma nota di esaki y tur e embeyecimento ta forma parti di e vision y maneho cu ta hibando e ultimo temponan.
Den cuadro di esaki a anuncia inicio di e proyecto di drechamento di e gazebonan y palapanan cual ta bay cuminsa otro siman. Ta bay percura pa drecha 11 gazebo y 3 palapa.
Banda di esaki lo embeyece e area aki, cual ta uno hopi bishita pa turistanan, a bisa.
Oduber a splica cu e area pa algun tempo ta forma parti di e parke marino cual ta wordo maneha pa Fundacion Parke Nacional Aruba. Nan ta percura pa conserva y cuida e naturalesa como conhuntamente cu e partnernan haya financiamento pa mantencion.
"Pesey den cooperacion entre Ministerio di Turismo, Aruba Tourism Authority y tambe Fundacion Parke Nacional Aruba a busca e financiamento necesario pa nos haci e inversionnan aki pa e trabaonan por cuminsa otro siman caba. Pa dentro di poco nos tin tur e palapanan y tur e gazebonan completamente nobo, completamente drecha, renoba", e mandatario a expresa.
