ORANJESTAD (AAN) – Den un conferencia di prensa yama pa Minister di Salud y Turismo, señor Dangui Oduber, el a haci un anuncio hopi importante, cu ta regarda cuido medico y esaki ta e MOU cu Hospital Dr. Horacio Oduber (HOH) y Instituto Medico San Nicolas (ImSan) a firma.
Tabata presente tambe Director di Hospital, Jacco Vroegop, director di ImSan dr. Joel Rajnherc, director di AZV Edwin Jacobs, Hunta di
Comisario, Inspeccion y Departamento di Salud Publico (DVG).
E mandatario a expresa cu ultimo lunanan nan tabata hopi intensivo, bezig cu negociacionnan pa yega na un acuerdo di cooperacion, pa prome biaha den historia y pesey nan ta considera e momento ey hopi special y historico, na unda ambos instituto cu ta duna cuido medico na Aruba, HOH, Imsan, Ministerio di Salud y AZV, a firma e acuerdo aki.
E mandatario a subraya cu nan a duna hopi espacio na Hospital y tambe na ImSan pa duna nan feedback, input, y contribucion, y cu tin consensus riba e contenido di e MOU.
Minister Oduber a reitera cu ta pa prome biaha den historia cu nan ta firma un MOU, unda e partidonan na mesa, awe ta bay traha hopi mas intensivo cu otro. “Nos ta sumamente contento cu e calidad halto di cuido, servicio y profesionalismo cu Instituto Medico ImSan y HOH ta brinda na nos comunidad. Nos tin cu ta conciente cu nos tin un seguro medico general tambe, cu ta algo unico na mundo, cu ningun otro pais no por ofrece, manera e seguro medico general cu nos tin na Aruba, cu un pakete asina amplio di cobertura”, e dignatario a señala.
Minister Oduber a subraya cu nos mester tene cuenta tambe cu tur e retonan cu tin; nos comunidad no ta esun di mas saludable. Hopi asegurado ta sufri di malesanan cronico, nos tin doble vergrijzing, y tambe e presion di e recorte.
“Pesey tambe na comienzo di 2020, hunto cu tur stakeholder den cuido medico na Aruba, nan a traha riba un rapport cu a wordo presenta, riba nan pensamento y posible solucionnan, pa tur e retonan cu tin riba cuido medico akinan”, e mandatario a señala. El a agrega cu Ministerio di Salud y AZV a contrata dos profesor di Hulanda, cu tambe a presenta posible solucionnan a base di e dos rapportnan aki.
Ministerio di Salud a traha un roadmap, cu ta hancra den e Landspakket, y un di e temanan cu tambe ta hancra den e roadmap aki, cu tambe a wordo presenta na e Ministerio di Salud di Hulanda, ta e tema di e samenwerking di Hospital y ImSan, y pesey nan tey pa concretiza esaki, segun e mandatario.
“E samenwerking tin diferente tema cu ta wordo atendi cune. E temanan cu ta wordo menciona den e acuerdo di cooperacion ta: un miho cooperacion, naturalmente, entre ambos instituto; entre e personal, e specialistanan, den e cuido cu ta wordo duna na e pashentnan di diabetes y tambe di dialisis, traha mas conhuntamente den e compra di remedinan, sistemanan y ekipo, y tambe integracion den e sistema di IT. Mi kier sa cu esaki ta un bon base di cooperacion pa cuminza traha mas estrecho cu otro. Nos tin pleno confianza den e profesionalismo y experticio cu ambos instituto ta brinda y nos ta convenci cu e cooperacion aki lo mehora e efectividad y eficiencia den cuido medico, y naturalmente e calidad di servicio cu ambos instituto ta ofrece”, Minister Dangui Oduber a señala.
Seguidamente, el a gradici director di Hospital Jacco Vroegop, director di ImSan Joel Rajnherc, y tambe AZV cu durante ultimo lunanan a traha intensivamente, pa por a yega na e producto final cu a wordo firma, pa mehoracion di e calidad di cuido cu ta e intencion tras di e firmamento di e MOU.
