ORANJESTAD (AAN) – Minister di Turismo y Salud, señor Dangui Oduber, a hiba palabra durante e conferencia di prensa den cual Departamento di Salud (DVG) hunto cu IBiSA,
a lanza e campaña “sa bo numbernan”, en conexion cu Dia Mundial di Concientizacion di Obesidad.
Minister Oduber a señala cu e ultimo dos añanan aki, cada un persona na Aruba a bira mas conciente di nan salud, entre otro, pa motibo di e pandemia. Hopi persona den e comunidad a busca diferente manera, sea pa come mas saludable y haci movecion pa asina hisa e inmunidad.
E mandatario tambe a referi na Dia 4 di Maart como Dia di Obesidad, cu ta un problema cu hopi hende, mundialmente, ta haya nan mes confronta y cu ta trece cune problemanan fisico, psicologico, emocional. Salud mental ta wordo afecta, self-esteem tambe y pesey ta importante pa e dia aki para keto y reflexiona riba tur esnan cu tin problema cu obesidad, y con por yuda y guia nan, pa mehora nan propio salud.
E dignatario a indica cu conhuntamente cu Ministerio di Deporte, Departamento di Salud Publico y IBiSA, a pensa riba e campaña “sa bo number” cu ta un cooperacion entre Departamento di Salud Publico y IBiSA, pa asina nos ciudadanonan sa nan number. Esaki kiermen cu cada persona mester sa si nan peso ta OK, si nan tin sobrepeso of tin problema cu obesidad. E luna aki nan kier pone enfoke riba salud y muy specialmente enfoke riba e problematico di obesidad, cu manera ta conoci ta afecta hopi persona na Aruba y mundialmente.
E mandatario a splica cu pa esaki DVG a lanza su website caba y riba dje ta bay tin un calculator via cual, cada persona cu subi e website por calcula pa nan mes a base di nan estatura y nan peso si esaki ta bon of tin sobrepeso of obesidad.
E indicador aki ta hopi importante pa cada persona tuma accion pa mehora nan propio salud.
E dignatario a señala cu Ministerio di Salud mes a lanza un plan di prevencion conhuntamente cu tur stakeholders local, y Organizacion Panamericano di Salud, y parti di esaki ta e campaña “pa bo sa bo number”, pero tambe ta bay bin cu un clinica pa e personanan cu tin problema cu peso, specialmente cu Obesidad. Nan ta trahando hopi duro riba e centro aki y den e proximo simannan, Minister di Salud lo duna mas informacion al respecto y su contenido.
