Gobierno lo sigui inverti pa frena e situacion:
ORANJESTAD (AAN): Matutino DIARIO a entrevista Minister di Husticia y Asunto Social, tocante e situacion desagradable cu a bin ta presentando na Aruba ultimo simannan aki, cu yegada di botonan procedente di Venezuela, cu personanan ilegal y incluso cu droga. Algo cu sigur ta ensombrece e nomber di Aruba.
Minister Rocco Tjon a expresa cu esaki tin di haber cu diferente factor, pero na prome lugar e dignatario a señala cu esaki ta algo sumamente lamentable, unda tin un caso unda hendenan a perde nan bida y e tin palabranan di condolencia pa e famianan concerni.
E dignatario a señala cu p’esey nan ta bay afo y desaconseha tur hende pa trata di no bin Aruba na e forma clandestino aki, pasobra e ta peligroso y banda di esey gobierno ta inverti masha hopi cen den tecnologia y personal, pa por intercepta e movecionnan aki tambe.
“Y mescos tabata e caso aki unda cu bultonan di droga a worde intercepta, personanan a worde deteni, y tambe tin un investigacion cu ta tumando lugar, pa loke ta e organizacion criminal cu ta tras di esaki”, e dignatario a indica.
Minister Tjon a subraya cu p’esey gobierno ta inverti riba diferente aspecto pa frenta esaki, pero publicamente nos ta divulga esaki y ta sigui inverti, pa nan sa si toch nan ta scoge pa haci esaki, apesar cu ta hopi peligroso pa nan mes, cu lo worde gara y mand’a back na nan pais, ora cu nan cumpli nan castigo”, e mandatario a bisa.
Minster Tjon a agrega cu mester sigui inverti den e cooperacion cu Venezuela, pa e botonan worde controla aya. “E radar di Aruba ta traha y por cierto, mi por anuncia cu e di cuater radar a yega y na comienzo di otro aña e lo worde instala, pa asina sigui fortifica, pa loke a e controlnan tecnico. E ta dificil pa bay den detaye di cada caso; pero tin ora bo no kier intercepta e boto riba lama, bo kier djis e yega pa bo por sigui cu bo investigacion. Pasobra no ta simplemente trece e contrabando akinan, pero aki na Aruba tambe tin personanan ta ricibi’e y distribui esaki, pa kizas despues bolbe export’e” Minister Tjon a splica.
“ Kiermen, e investigacionnan ta worde conduci y tin ora ta bon pa e botonan aki drenta Aruba, y si nan drenta mes nan ta worde intercepta pasobra nan ta worde gara door di e radar, y nos tin cameranan aworaki pega, practicamente, na tur caminda cu e autonan cu ta bay busca e droga aki, lo mester pasa”, Minister Tjon a agrega.
E dignatario a expresa cu nan investigacionnan ta sumamente eficiente, eficaz y riguroso. P’esey tin ora radar ta capta e boto, pero deliberadamente no ta intercept’e riba lama sino cu mester warda p’e yega tera.
Encuanto bin cu un ley contra esnan cu ta difundi e propaganda afo “Ven a vivir en ester paraiso” cu ta circulando, entre otro na Venezuela, Minister Tjon a bisa cu ta masha dificil pa bin cu un ley asina. “E acto di yuda un persona yega akinan na un forma ilegal, ta castigable. P’esey nos leynan t’ey caba, pero pa simplemente propagand’e ta hopi dificil pa haci esey castigabel”, e mandatario a indica.
El a agrega cu e ta sumamente satisfecho cu e sentencia cu a worde duna dos siman pasa den un caso di traficacion di hende unda Huez a baha hopi pisa riba e personanan concerni, y a dicta sentencia di mas of menos 5 aña pa cada persona. P’esey gobierno ta sigui inverti e investigacionnan ta mas eficiente y eficaz y Huez por duna sentencianan manera esaki.
