ORANJESTAD(AAN): Ministerio di Enseñanza tin diferente reto grandi su dilanti, di cual uno ta e situacion di weksters di SKOA, otro ta e instructornan di landamento y asina tin algun mas.
Esaki minister di Enseñanza y Deporte Endy Croes a trece dilanti durante un conferencia di prensa Dialuna mainta.
El a splica cu su intencion ta pa categoriza e problematicanan cu tin atencion di Gobierno y poco poco di acuerdo cu su maneho busca solucionnan sostenible y concreto.
E mandatario a papia tambe tocante e hecho cu tin 33 mucha di EPB cu no por a cuminza scol.
“Nos ta lamenta esaki masha hopi y 21 di e muchanan aki ta cay bao di EPB Oranjestad y 12 ta di EPB San Nicolas”.
Pa loke ta e motibo, nos a compronde cu den e caso aki tin un maneho unda cu maestronan no por pasa traha mas cu 4% na extra oranan, pero banda di esey bo tin e ley di Leerplicht tambe, segun Croes.
El a indica cu mesora el a pidi Inspectie pa nan comunica cu EPB pa busca solucion.
“E ministerio aki sigur ta pro solucion y mesora Inspectie a reuni cu EPB”.
Nos a compronde cu e conseho cu nos a ricibi caba di Inspectie ta positivo pa nan por habri 2 klas mas.
Aworaki EPB ta mantene e maneho di e norma na 4%, pues si bo habri dos klas mas bo ta bay surpasa e norma y e minister lo mester tuma un decision riba esaki.
Mirando e importancia, e leerplicht cu tin y cu nos vision ta pa percura pa brinda un calidad di estudio pa tur nos muchanan, nos a pidi tambe nos coordinador di presupuesto pa mira internamente den nos propio presupuesto con nos por aloca extra placa pa esaki.
Nos ta riba e bon caminda y casi nos por anuncia cu nos ta canando den bon direccion, unda cu e siman aki nos lo concretiza e parti pa soluciona e problema aki, segun Croes.
El a splica cu e intencion ta pa habri e dos klasnan aki y firma pa por pasa e norma di 4%, cu ta bay ta algo bao di 6%, segun calculacionnan preliminario.
“Ta nos deber pa percura pa e muchanan aki cuminza scol y mas durante e siman nos lo duna e detayenan concreto, premirando cu pa otro siman lo tin e solucion pa e hobennan aki por cuminza nan scol”, segun Croes.
