Den cuadro di e Plan Nacional:
ORANJESTAD (AAN) – Diaranzon cu a pasa, Minister di Salud y Turismo, señor Dangui Oduber, hunto cu su coleganan di Ministerio di Salud, a presenta na Director di AZV, Ir. Edwin Jacobs, un programa di prevencion di salud, den cuadro di e Plan Nacional unda prevencion ta central den e maneho di Minister Oduber, durante su cuater añanan di gobernacion.
Den e programa cu a wordo presenta e dignatario a enfoca riba cuater pilar. El a splica kico cada un ta encera.
Elaborando riba e prome pilar, Oduber a splica cu e kier introduci un “Aruba Healthy Life Style Center”, cu lo mester bira un centro pa yuda esnan cu tin problema di obesidad. Yuda nan den e trayecto pa adapta y cambia nan estilo di bida pa nan tin un manera mas saludable di come, participa activamente den actividadnan fisico.
Como di dos pilar e mandatario a referi na e proyecto “Jump eighteen”. Esaki a cuminza cu un proyecto piloto aña pasa, cu muchanan entre 4 aña y hobennan te cu 18 aña di edad.
“Un proyecto cu a resulta hopi exitoso unda a guia e mucha y hobennan cu tin problema cu obesidad, pa yuda nan adapta na e cambionan di estilo di bida. Ta importante pa menciona cu durante e proyecto piloto aki, ningun di e muchanan cu a participa a subi di peso, locual ta un indicacion cu e programa a duna resultado”, Minister di Salud a señala.
E mandatario a indica cu nan a presenta e di dos pilar aki na AZV, pa sostene esaki y yuda financieramente pa sigui cune, y amplia e cantidad di muchanan cu ta participa.
E di tres pilar ta “Scol Saludable”. E dignatario a indica cu na e momentonan aki tin diez scol cu ta participando den e programa aki, cu ta wordo guia pa Departamento di Salud Publico, Seccion Salud Hubenil.
E di cuater pilar ta e concientizacion, e voorlichting, cu ta importante pa por duna informacion na comunidad y concientiz'e riba e importancia di hiba un estilo di bida mas saludable.
Minister di Salud a haya di vital importancia pa presenta e programa aki na AZV como un proyecto piloto, pa wak si e instancia aki por financia esaki pa e aña aki, pasobra e intencion ta pa, na un manera structural, busca manera pa financia e proyecto pa e proximo añanan di gobernacion. Intencion ta pa crea un fondo cu ta bay reemplaza e “covid insurances” na aeropuerto y henter e entrada cu wordo genera, door di e fondo aki, lo wordo inverti bek den, entre otro, prevencion y ampliacion di e capacidad di ICU na Hospital, den cuadro di un miho preparacion, en caso cu cualkier eventualidad presenta y casonan lo bolbe subi.
“Kiermen, e tabata un mainta exitoso pa mi ministerio, unda nos por a comparti cu AZV tur informacion relevante, pa tuma un decision si AZV lo bay di acuerdo pa yuda nos financia e proyecto piloto aki, pa e proximo seis lunanan nos dilanti. Intencion ta pa na aña 2023 pa dilanti, pa medio di e fondo crea nos mes haya financiamento pa e proyecto aki. Dus, nos ta spera cu nos por conta cu e sosten di AZV pa asina nos por cuminza cu e programa cu a wordo presenta na AZV”, Minister Dangui Oduber, titular di Salud y Turismo a conclui.
