Den cuadro di Programa “Aruba mester di nos tur” --- ORANJESTAD (AAN) – Minister di Turismo y Salubridad, señor Dangui Oduber, a dirigi na prensa pa referi na e reunion di Gabinete Wever-2 cu Parlamento, pa presenta e vision y maneho di gobierno, pa e periodo 2021-2025.
Ta trata aki di e Programa “Aruba mester di nos tur” unda cada minister a haya chens di presenta nan vision y maneho kico tur nan kier mira ehecuta pa e proximo cuater añanan di gobernacion.
Oduber, tocante su ministerionan di Turismo y Salud, a elabora encuanto su maneho den cada un di e carteranan aki.
SALUD:
E dignatario a señala cu pa loke ta trata su cartera di Salud Publico, e lo enfoca riba prevencion den salud, riba mehoracion riba calidad di cuido, pa e aseguradonan y tur ciudadano na Aruba, enfoca riba innovacion.
Tambe dentro di e marco di turismo, lo enfoca riba turismo medico. E dignatario a constata cu e gastonan di cuido medico ta sigui subi gradualmente.
“Na e momentonan aki mi tin un presupuesto di casi 160 miyon, y segun tur e proyeccionnan pa e proximo diez añanan e ta bay aumenta te cu 750 miyon; kiermen, ta momento pa nos tuma accion riba un miho control di gastonan den cuido, pa nos ta mas responsable tocante cuanto e cuido ta costando nos ciudadanonan. Nos ta trahando riba un acuerdo di cooperacion entre ImSan y Hospital, den cuadro di eficiencia pa por baha e gastonan. Nos ta trahando tambe riba un proceso di destaho publico, na tur e hospitalnan di Colombia pa asina nos haya un miho prijs pa nos baha e gastonan y un miho calidad di servicio aki tambe”, e Titular di Salud a bisa.
El a menciona e AruBig cu e ta considere un logro historico, unda gobierno ta reconoce e yiunan di tera cu a bay studia Medicina den region, no solamente reconoce nan, pero registra nan den Aruba su propio registro di AruBig, practica localmente, nan por haya un contrato brinda door di Aseguro Medico General, y manera gobierno a anuncia caba e prome docter di cas cu a caba su estudio na Colombia, cu prome cu AruBig no por a haya trabao na Aruba, no por a wordo reconoci.
E mandatario a subraya cu prome, cu Gabinete Wever-Croes-1, nan a concretiza AruBig cu e yiu di tera aki por a bin Aruba, haya un contrato cu AZV y ya caba e ta practicando. Oduber ta convenci cu AruBig ta bay yuda e presion cu tin den cuido, y baha e listanan di spera largo cu tin, cu tambe ta un obhetivo di su maneho, door di yena e vacaturanan via AruBig, cu ta habri horizontenan nobo y brinda oportunidad na e yiunan di tera pa sigui specializa den e region na paisnan manera Colombia, Costa Rica, Merca, Canada; bin bek Aruba y yuda baha e presion cu tin.
E mandatario a reitera cu lo bay controla e calidad di cuido cu ta wordo brinda na e aseguradonan na Aruba, pa medio di e Instituto di Calidad, cu ta instrumental pa sigui implementa AruBig. “E ta e asina yama Institute kwaliteit, cu ta bay determina kico ta bira e calidad di cuido di Pais Aruba, cu nos kier ofrece na nos ciudadanonan, na nos aseguradonan”, e mandatario a señala, indicando tambe cu ya caba e proceso pa implementa e instituto aki a cuminza.
