*Vuelonan importante pa diversificacion di mercado --- ORANJESTAD(AAN): Diaranzon atardi Minister di Turismo Dangui Oduber tabata na aeropuerto pa duna un bon bini na e representante di Sarpa Airlines
y pa anuncia pues cu for di luna di December venidero e aerolinea ta bay cuminsa cu vuelonan pa Aruba for di Colombia.
“E noticia aki ta uno sumamente positivo pa Aruba su turismo caminda lo bay diversifica e mercado Colombiano cu 2 ruta nobo”.
Di manera aki Aruba ta sigui reconstrui e mercado importante aki creando mas conectividad entre Aruba y Colombia, segun Oduber.
Sarpa Airlines ta existi pa mas di 40 aña, pero ta recientemente cu nan a cuminza cu vuelonan comercial.
Den pasado nan tabata duna servicionan di vuelo charter y tambe di air ambulance. E aeroliña ta habriendo diferente ruta nobo den Caribe incluyendo Corsow, pero Aruba ta e unico isla cu ta bay ricibi 2 vuelo semanal for di Barranquilla y Medellin. E vuelo inaugural lo bay tuma lugar dia 2 di Januari 2022.
Banda di e 2 rutanan menciona Sarpa Airlines ta trahando duro pa logra habri un ruta directo for di e ciudad di Cali. Sarpa Airlines lo bay ofrece e servicio di 2 vuelo semanal directo pa Aruba for di Barranquilla y Medellin riba Diaranzon y Diadomingo.
E aeroliña lo ta uzando e tipo di avion jet Embraer 145LR cu tin un capacidad di 50 stul. E rutanan di Barranquilla y Medellin ta rutanan cu den pasado ya caba a yega di wordo uza, pero pa diferente factornan nan no a resulta exitoso. Sarpa Airlines ta di opinion cu como nan avion ta di 50 stul e lo ta ideal pa e ruta nan aki ta un exito e biaha aki.
Sarpa tin proyecta pa trece alrededor di 15.000 turista den aña 2022 pa Aruba. Minister Oduber ta sigui diversifica nos turismo y cu e vuelonan nobo aki ta percurando pa ehecuta e vision di diversificacion.
Minister Oduber a yama un danki na e CEO di Sarpa Airlines Sr. Carlos Mesa y tambe na e propietario di e aeroliña Sr. José Roberto Luna pa duna Aruba e confianza. Tambe e mandatario a manda palabra di elogio pa ekipo di AAA y ATA cu ta trahando duro pa Aruba keda diversifica nos mercadonan den Latino America.
